ناڤهندا نووچهیان – سهما
ل سالا 2014ێ، ل دەمێ جینۆسایدا کو ڕێکخراوا داعشێ دژی ئێزدییان ل شنگالێ ئەنجامدایى، ب ههزاران مرۆڤێن بێ گونهـ هاتنە کوشتن، و ب ههزاران خێزان ئاوارە بوون و کەفتنە دەستێ داعشێ. ئێک ژ وان ژی کچا ئێزدی ئەمیرە عەلی بوو.
ئەمیرە بتنێ یا 10 سالی بوو دەمێ ژ لایێ داعشێ ڤە هاتیە ڕەڤاندن، و چەندین مەهێن پڕی ئازار و نەخۆشی دەرباز کرن. سەرەرای وان ڕەوشێن تاری، وێ دەست ژ هیڤی و هێزا خۆ بەرنەدا.
ئيرۆ، پشتی کو ژ دەستێ وان ڕزگار بووی و ژیانا خۆ ل وهلاتێ ئوسترالیا دوبارە ئاڤاکری، ئەمیرە چیرۆکا خۆ دگەل جیهانێ بەلاڤ دکەت ب ڕێکا بیرهاتنێن خۆ یێن کاریکەر ب ناڤێ:“For Ali, For Us All: Messages From Captivity”
(بۆ عەلی، بۆ مە هەموویان: پەیامێن ناڤ ئێخسیریێ).
ئەڤ پەرتووکە وان پەیڤان بخۆڤە دگرت یێن کو وێ ل دەمێ ئێخسیریێ نڤیسینە، دا کو دەنگێ کچەکا ئێزدی وەک ديدهڤانهك ل سەر ڕاستیێ بمینت.
چیرۆکا ئەمیرايێ بتنێ چیڕۆکا ڕزگاربوونێ نینە، بەلکو چیڕۆکا خۆڕاگری و کەرامەتێ یە. ئەڤە بەلگەیە ل سەر هێزا ژنێن ئێزدی د گوهۆڕینا ئازاران بۆ هێزێ و داخوازکرنا دادپەروەریێ. ب ڕێيا بەلاڤکرنا چیڕۆکا خۆ، ئەمیرە هاریکارە کو بیرهاتنا وان تاوانێن دژی ئێزدییان هاتینە کرن د ویژدانا جیهانێ دا ب زیندوویی بمینت، و هیڤیێ ددەتە نفشێن پاشەڕۆژێ.
ئەمیرە عەلی نوکە ل باژێرێ “ئارمیدال” دژیت، کو باژێرەکێ هەرێمی یە ل باکورێ نيو ساوس ويلز ل وهلاتێ ئوسترالیا.
هێرشا ڕێکخراوا تيرۆرستییا داعش بۆ سەر شنگالێ ل 3ی تەباخا (ئاب) 2014ێ، ئێک ژ دلتەزینترین و دژوارترین جينۆسايدێن ل دژى مرۆڤایەتیێ بوو د سەدێ 21ێ دا. ئەڤ هێرشە ب مەبەستا ژناڤبرنا پێکهاتەیا ئێزدی هاتبوو ئەنجامدان.
ل سبا 3ی تەباخا 2014، چەکدارێن داعشێ ژ چەند لایەکی ڤە هێرشی سەر قەزا شنگالێ و گوندێن دەوروبەر کرن. ب هزاران خێزانێن ئێزدی نەچاربوون بەرەڤ چیایێ شنگالێ بڕەڤن. ل وێدهرێ، ب ههزاران کەس د بن دۆرپێچهكا دژوار دا، بێ ئاڤ و خوارن بۆ چەندین ڕۆژان مان.
ههروههست ب ههزاران زەلام و گەنجێن ئێزدی هاتنە کۆمکوژکرن تەنێ ژبەر ئایینێ وان، پتر ژ شهش ههزار ژن و کچ و زارۆک و زهلام هاتنە ڕەڤاندن. ژن و کچ وەک “سەبایا” ل بازاڕێن نەخۆش یێن داعشێ هاتنە کڕین و فرۆتن و ڕووبەڕوویێ دژوارترین توندوتیژیێن سێکسی بوون.
سەرەڕای هندێ کو 11 سال ل سەر وێ جينۆسايدێ دەرباز بووینە، هەتا نۆکە ژی ب ههزاران ئێزدی د ناڤ کەمپان دا دژین و نكارينه ڤەگەڕنە سەر جهـ و مالێن خۆ، هێشتا چارەنڤیسێ ب سەدان ژن و زارۆکێن ڕەڤاندی یێ وندایە.
