ناڤەندا نووچەیان – سەما
پشتی چاڤەڕێبوونەکا درێژ و خەباتەکا بەردەوام بۆ ب دەستڤەئینانا مافێن ڕەوا، بڕیارا تەرخانکرنا پارچەیێن عەردی بۆ کەسوکارێن جانگۆڕییێن ئێزدی چۆ د قۆناغا بجهئینانێ دا.
رەفعەت سمۆ، هاریکارێ پارێزگارێ نەینەوا بۆ کاروبارێن کارگێڕی، ئیرۆ چارشەمبوویێ 18ی ئادارا 2026ێ ڕاگەهاند: پارێزگارێ نەینەوا عەبدولقادر دەخیل ب فەرمی رەزامەندی ل سەر پێدانا پارچەیێن عەردی یێن ئاکنجیبوونێ بۆ کەسوکارێن 24 جانگۆڕییێن ئێزدی دا، ئەوێن کو ل سالا 2007ێ ب دەستێن تیرۆرستان هاتبوونە کوشتن.
ئەڤ بڕیارە پشتی نێزیکی 19 سالان ژ وێ کارەساتا دلتەزین دئێت. هاریکارێ پارێزگاری ئاماژە ب وێ یەکێ کر کو ئەڤە مافەکێ دەستپێکێ یێ ڤان مالباتانە کو سالانە دهاتە پاشخستن، لێ ب بزاڤێن بەردەوام ئیرۆ هاتە بجهئینان وەک وەفادارییەک بۆ خوونا وان شەهیدێن کو د کریارەکا تیرۆرستی یا ترسنۆکانە دا بوونە قوربانی.
ل نیسانا سالا 2007، چەکدارێن ڕێکخراوا قاعیدە یا تیرۆرستی ڕێیا پاسەکێ گرت کو 24 کریکارێن ئێزدی یێن کارگەها ڕستن و چنینێ ل مووسل ڤەدگوهاستن بەر ب ناحیا باشیکێ و گوندێ بەحزانێ، و ب شێوەیەکی هۆڤانە هەموو شەهید کرن. ئەڤ تاوانا مەزن وەک برینەکا کوور د دلێ پێکهاتێ ئێزدی دا مابوو.