ناڤهندا نووچهیان – سهما
د پێشهاتەکا نوو و نەرێنی دا وهزيرێ ناڤخۆيا ئتيحيادى ب فەرمی پێشنیارا ویلایەتا راین وێستفالیا بۆ سهكناندنا زڤراندنا ب زۆری یا پەنابەرێن ئێزدی بۆ عێراقێ ڕەتکر و و ئەڤ بڕیارە بوویە ئەگەرێ دلگرانیيەکا مەزن د ناڤ رەڤەندا ئێزدیيان دا ل وهلاتێ ئهلمانيا.
مالا ئێزدييان يا كهلتۆرى ل باژێرێ كۆلن و دهوروبهران د بهياننامهيهكێ دا خەمگینیا خۆ دیار کر و ڕاگههاند، پشتی بزاڤێن ڕژد بۆ ماوێ پتر ژ دو سال و نیڤان ب پشکداریا مالا ئێزدیان ل کۆلن و ب هەماههنگی دگەل وەزارەتا خۆ گونجاندنێ و هەژمارەکا پەرلەمانتارێن پارتێن دیمۆکرات ل چريا ئێکێ یا سالا 2025 ياسا هاتیيە پەسەندکرن، وەک تیشکا هێڤیەکا راستی بوو بۆ ب ههزاران ئێزدیيێن کو مەترسیا زڤراندنێ بۆ عێراقێ ل سەر هەبوو.
ههروهسا ڕەتکرنا ڤێ یاسایێ نیشانا بەردەوامیا سیاسەتەکا توندە ل دۆر پەنابەران ب بێ کو ڕەوشا مرۆڤاتی و مێژوویی و ئازارێن ئێزدیيان ل بەر چاڤ بێنە وهرگرتن، ئەڤ چەندە ژی دبتە ئەگەرێ زێدەبوونا دلگرانی و نەئارامیێ د ناڤ چهندين خێزانان دا.
د پشكهكا دى يا بهياننامهيێ دا هاتييه، د ڤێ دەربارێ دا ئەم دوپات دکەین کو ئەم د بەردەوامین ل سەر بزاڤ و پەیوەندیێن خۆ دگەل بڕیاربدەران ل سەر ئاستێ ویلایەتێ و حکومەتا فیدڕال، دا کو چارەسەریەکا دادپەروەرانە پەیدا بکەین. هەروەسا ئەم دەستخۆشیيێ ل هەلوهستێ وەزیرا خۆگونجاندنێ ل NRW دکەین کو پشتەڤانە بۆ نەزڤراندنا ئێزدیيان کو ئەڤە پابەندبوونا وێ یا مرۆڤاتی نیشان ددەت.
ل هەمان دەم دا ئەم هۆشداریێ ددەین ژ مەترسیا هندەک کاران کو دبت کاریگەریا نەرێنی ل سەر ڕەوشا یاسایی یا پەنابەران بکەت ب تایبەت گەشتکرن بۆ وەلاتێ دایکێ ب ڕێيا بەلگەنامەیێن پەنابەریيێ، چنکو ئەڤ چەندە دبتە ئەگەرێ ژ دەستدانا مافێ پاراستنێ و مەترسیا زڤراندنێ.
ديار ژى كرييه، داخوازێ ژ رەڤەندا خۆ دکەین کو پابەندی یاسا و ڕێنمایان ببن، پێخەمەت پاراستنا مافێن وان یێن یاسایی و پاشەڕۆژا وان ل ئەلمانیا.
ل داویيێ ئەم پابەندبوونا خۆ یا تەمام دوپات دکەین بۆ بەردەواميیا کار و بەرەڤانیکردنێ ژ مافێن رەڤەندا خۆ و داخوازا هەڤگرتنێ د ڤێ قۆناغا هەستیار دا دکەین.