ناڤەندا نووچەیان- سەما
سەرۆکێ حکۆمەتا هەرێما کوردستانێ، هێرشا سەر مالا سەرۆکێ هەرێمێ ب توندترین شێوە شەرمەزار دکەت و دبێژت: هەموو مافەکێ مە یێ هەین بۆ بەرهنگاربوونا ڤان تیرۆرستان و هەر گاڤەکا پێتڤی بت بۆ پاراستنا هەرێما کوردستانێ دێ هاڤێژین.
ئیرۆ شەمبوویێ، 28ی ئادارا 2026، مەسرور بارزانی، سەرۆکێ حکۆمەتا هەرێما کوردستانێ، ل دۆر هێرشکرنا سەر مالا نێچیرڤان بارزانی، سەرۆکێ هەرێمێ، پەیامەک بەلاڤکر.
د پەیاما سەرۆکێ حکومەتێ دا هاتییە: “هێرشا بێ ترسانە یا درۆنی بۆ سەر مالا سەرۆکێ هەرێما کوردستانێ ل باژێرێ دهۆکێ، ب توندترین شێوە ئیدانە و شەرمەزار دکەین.”
مەسرور بارزانی د پەیاما خۆ دا، جارەکا دی داخوازییێ ژ حکومەتا فیدڕال دکەت کو ل ئاستێ بەرپرسیارەتییێ بن و ڤان تاوانبارێن ژ یاسایێ دەرکەفتی بدەنە دادگەهێ و سنوورەکێ بۆ بەردەوامیا هێرشێن تیرۆرستی یێن ڤان گرۆپان دانن.
د پشکەکا دی یا پەیامێ دا، سەرۆکێ حکومەتێ داخوازێ ژ جڤاکێ نێڤدەولەتی و دۆستان دکەت کو هاریکارییا هەرێما کوردستانێ بکەن بۆ پاراستنا وەلاتیان و بەرژەوەندیێن هەرێمێ.
مەسرور بارزانی د پەیاما خۆ دا تەکەزی ل سەر وێ چەندێ کرەڤە: “هەموو مافەکێ مە یێ هەین بۆ بەرهنگاربوونا ڤان تیرۆرستان و هەر گاڤەکا پێتڤی بت بۆ پاراستنا هەرێما کوردستانێ دێ هاڤێژین.”