دیدار: مەروان داود – سەما
هۆزان دینۆ، ئەو دەنگێ کو ب سۆز و ئەڤینا وەلاتی هاتییە ناسکرن، د دیدارەکا تایبەت دا بۆ “سەما تیڤی ” بەحسێ وێستگەهێن ژیانا خوە و حەزژێکرنا خوە ب جڤاکا ئێزدی دکەت.
دینۆ کو ب سترانا “ئۆی یارێ” د دلێ هەر کوردەکێ دا جهێ خوە کرییە، د ڤێ دیدارێ دا ب رێز و مەزناهی ڤە ل مێژوو و رۆڵێ ئێزدیان دنێرت.
ژ دایکبوون و دەستپێکا ژیانا هۆنەری
هۆزان دینۆ ل سالا ١٩٦٩ ل گوندێ (خەوسکاری) ل باکورێ کوردستانێ ژ دایک بوویە. خواندنا خوە یا سەرەتایی و ناڤنجی ل دەڤەرا (خۆچڤان) تەمام کرییە. ژ پێخەمەت ب دەستخستنا زانست و لایەنێ ئەکادیمی یێ هۆنەری، بەرەڤ ئیستەنبولێ ب رێ کەفت و ل وێدەرێ بوو ئەندامەکێ کارا د ئەکادیمییا ناڤەندی یا چاند و هۆنەرا میزۆپۆتامییە دا.
دینۆ هۆنەرمەندەکێ گشتگیرە؛ تێکست، ئاواز و مۆزیک ب تەمامی بەرهەمێ هزرا وی نە. بەرهەمێن وی ئاوێنەیا ئەڤینا وەلات، شۆرەش، جوانییا سروشتێ کوردستانێ و پرسێن مرۆڤایەتیێنە.
کۆچبەری و خەبات ل غوربەتێ
ل سالێن ٩٠ دان ژ چەرخێ دەرباسبووی، ژبەر تێکچوونا بارودۆخێ سیاسی یێ کوردان ل باکورێ کوردستانێ و تورکیا، و هەروەسا هندەک ئاریشەیێن ئابووری، هۆزان دینۆ نەچار بوو ل سالا ١٩٩٨ روو بکەتە وەلاتێ هۆلندا و هەتا ئیرۆ ژی ل وێدەرێ ژیانا خوە بەردەوام دکەت، لێ چ جاران دەست ژ خزمەتکرنا هۆنەرا کوردی بەرنەداینە.
ئێزدی و پاراستنا رەسەناتیا کوردی
دەربارەی جڤاکا ئێزدی، هۆزان دینۆ د دیدارا خۆ دا بۆ (سەما) وەسا گۆت:
“سلاڤ بۆ هەموو جڤاکا مە یا ئێزدی و ب تایبەت ئێزدیێن مە یێن شنگالێ. ب راستی جڤاکا مە یا ئێزدی پارێزڤانێن هەرە دەستپێکێ یێن چاند و هۆنەرا کوردی یا رەسەنن. سەرەرایی وان هەموو جینۆساید و هەولێن ژ ناڤبرنا ڤێ جڤاکا ڕەسەن و پیرۆز، هەر مان و دێ هەر مینن، دەما دزانم دناڤ ڤێ جڤاکێ دا حەزژێکەر و پشتەڤانێن من هەنە، ئەز هەست ب بەرپرسیاریەتیەکا مەزنتر دکەم.”
هیڤی و پەیاما دوماهییێ
دینۆ ئاشکەرا کر کو پلان هەیە ئەڤ سالە سەرەدانا باشوورێ کوردستانێ بکەت و گۆت: “دێ ب دیتنا حەزژێکەرێن دەنگێ خۆ شاد بم، من دڤێت ئەز ل جهێن جوان یێن کوردستانێ بگەرم، وەک زاخۆ، دهۆک و ب تایبەت لالشا نورانی.”
د تالیا پەیڤێن خوە دا، هۆزان دینۆ بانگا ئێکگرتنێ ل کوردان کر و گۆت: “پێدڤییە کورد د ئێکگرتی بن، دووبارە سلاڤێن من بۆ هەمووان.”
گرنگترین ئەلبۆم و بەرهەمێن هۆنەری یێن هۆزان دینۆ:
• ئەلبۆما (یارا من – Yarimî): کو سترانا بناڤودەنگ (ئۆی یارێ) تێدا بوو.
• ئەلبۆما (چوو – Çû): کو دەنگڤەدانەکا مەزن ل سەر ئاستێ کوردستانێ هەبوو.
• ئەلبۆما (نۆژین – Nojîn).
• ئەلبۆما (بێ ناز – Bê Naz).
• سترانا (بێریڤانێ).
• سترانا (وەلاتێ من).