ناڤەندا نووچەیان – سەما
توافا شێخ مەند کو بڕیارە سبەی ڕۆژا چارشەمبوویێ 22-4-2026 ل ناحیەیا خانکێ ب ڕێڤەبچت، بڕیار هاتە دان کو ڕێورەسمێن توافێ بێنە سنووردار کرن.
سێ شەمبوویێ، 21ی نیسانا 2026، زێدان شێخ کچۆ، مجێورێ مەزارگەهێ شێخ مەند ل گوندێ هەوێریا ل ناحیەیا خانکێ ڕاگەهاند: ِرێورەسمێن توافێ ب شێوەیەکی جودا دێ ب ڕێڤەچن، ئەو ژی دهۆل و زڕنا ب چو شێوەیان لێنادەن و ب تنێ ڕێورەسمێن ئۆلی وەکو پەری سوارکرن دێ ئێنە ئەنجامدان، هەروەسا وەک نەریتەکێ دیرۆکی چێکرنا سماتێ دێ یا بەردەوام بت و ئێتە بەلاڤکرن ب سەر زیارەتکەران دا.
زێدان شێخ کچۆ ئاماژە ب وێ چەندێ ژی دا، کو ئەڤ بڕیارە بتنێ ژبۆ پاراستنا خەلکێ یە، ژ بەر ڕەوشا نۆکە دەڤەر تێدا دەرباز دبت و داخوازێ ژ هەموو وەلاتییان دکەین کو پابەندی ڕێنمایان ببن دا کو سلامەتیا هەموو لایەکی پاراستی بت.
هەر سال پشتی جەژنا سەرسالا ئێزدییان، ڕێورەسمێن توافان ل گوند و کۆمەلگەهێن ئێزدییان دەست پێ دکەن.