ناڤەندا نووچەیان – سەما
زێدەتر ژ سێ ههزار ئێزدیيێن ڕزگاربوویێن ژ دەستێ داعش، مفادارێن پڕۆژێ هاریکاریا دارایی یا مەسرور بارزانی، سهرۆكێ حكومهتا ههرێما كوردستانێ نە، هەروەسا پڕۆژە خواندنا بێبەرامبەر بێی مەرجێ تهمهنى و پشتهڤانييا دەروونی ژی ب خۆڤە دگرت.
ئیمان عەبدوللا، سەرپەرشتیارا پڕۆژەيى بۆ سهما ڕاگەهاند، ئيڕۆ ڕۆژا پێنج شهمبوويێ 9-4-2026، ل قهزا شێخان مە دەست ب بەلاڤکرنا هاریکاریيا هەیڤێن ئێك و دوو يێن ئيساله بۆ ڕزگاربوویێن ژ دەستێ داعش کر، کو ژ لایێ مەسرور بارزانی، سەرۆکێ حکومەتا هەرێما کوردستانێ ڤە هاتیيە دابینکرن.
ئیمان عەبدوللا ئاماژە ب وێ چهندێ دا، پڕۆژەيى د هەیڤا تەباخا سالا 2024ێ دا دەستپێکریيە و تا نوکە یێ بەردەوامە، هەروەسا سێ ههزار و 588 کەس ژ هاریکاریيا سەرۆکێ حکومەتێ مفادار بووینە و ئەڤ ژمارە یا ل زێدەبوونێ دایە؛ تەنانەت ئەوێن ل دەرڤەی وهلاتی ژی دكارن ب ڕێيا لینکەکێ پێزانینێن خۆ تۆمار بکەن و ژ ڤێ هاریکاریيێ مفادار ببن.
دوپاتكر، ئەڤ پڕۆژە نەک بتنێ پشتهڤانييا دارایی يه، بەلکو پشتەڤانیيا خواندنێ ژی دگەلدایە و ڕزگاربوويى دكارن ژ خواندنا بێبەرامبەر مفای وەربگرن؛ ئەگەر تهمهنێ وان یێ مەزن ژی بت وەک حالەتەکێ تایبەت سەرەدەری دگەل دئێتە کرن و دكارن ل قوتابخانەیان بخوونن. پڕۆژە نەک بتنێ قوتابخانە، بەلکو زانکۆ و خواندنا بلند ژی ب خۆڤە دگرت.
ل ڕێككهفتى 02-07-2024، ب ئامادەبوونا مەسرور بارزانی، سەرۆکێ حکومەتا هەرێما کوردستانێ، ڕێورەسمێن ڕاگەهاندنا بەرنامێ پشتهڤانييا دارایی بۆ ڕزگاربوویێن ژ دەستێ تیرۆرستێن داعش ل هۆلا سەعد عەبدوللا ل باژێرێ هەولێرێ ب ڕێڤهچۆن.
تيرۆرستێن داعش ل 3ـێ تەباخا سالا 2014ێ ئێرش کرە سەر قەزا شنگال. هەژمارا ئاکنجیێن وێ قەزایێ بەری ئێرشێ نێزیکی نێزيكى 500 ههزار کەسان بوو، پشتی ئێرشا داعش، نێزیکی 300 ههزار کەس ئاوارە بوون کو پتريا وان ئێزدی بوون. ژ وێ هەژمارێ ب دههان ههزار کەسان قەستا چیایێ شنگال کر و ل وێدهرێ ئاسێ مان داکو ژ دهستێن تیرۆرستێن داعشێ ڕزگار ببن.
ژ ئەگەرێ ئێرشا داعش بۆ سەر قەزا شنگال، پتر ژ ههزار کەسێن ئێزدى هاتنە کوشتن و شەش ههزار و 417 كچ و ژن و زهلام و زارۆکێن ئێزدی ژ لایێ تيرۆرستێن داعشێ ڤە هاتنە ڕەڤاندن.
