چەند رۆژێن کێم ماینە و دێ پێشوازیێ ل سیهـ و سێیەمین سالڤەگەرا دامەزراندنا بنگەهێ لالش یێ رەوشەنبیری و جڤاکی کەین؛ ئەو دەزگەهێ بەرچاڤ و بلند یێ کو وەک بەرهەمێ خوینا ههزاران شەهیدێن کوردستانێ هاتیە دامەزراندن.
ل دەستپێکێ، سەرێ رێز و نەوازشێ بۆ وان ئاڤاکەرێن ئێکێ دچەمینین یێن کو ژ دنیایێ وهغهر بووین، پشتی کو شوون دەستێن وان یێن دیار د بلندکرنا ناڤ و پێگەهێ بنگەهی دا ل سەر ئاستێ رەوشەنبیری یێ کوردستانێ و عیراقێ ب گشتی مایینە خوهیایی.
هەروەسا جوانترین پەیڤێن حەزژێکرن و رێزگرتنێ ئاراستەی هەموو ئەندامێن بنگەهی دکەین، چ ئەوێن د دەستەكێن کارگێڕی دا بن یان ژی د دەستەكا گشتی دا.
هەروەسا، ئەم ب ئەرکێ خۆ دزانین کو سوپاسی و پێزانینێن خۆ ئاراستەی سەرکردایەتیا کوردستانێ بکەین، ب تایبەتی فەخامەتا سەرۆک و مەرجەع مەسعود بارزانی، و فەخامەتا سەرۆکێ هەرێما کوردستانێ نێچیرڤان بارزانی ژبۆ وێ پشتەڤانی و گرنگیدانا وان ب ڤێ دەزگەها دێرین، ب تایبەتی ژی د دەستپێکا دامەزراندنا وێ دا.
هەروەسا نها ب هەموو شانازی و سەربلندی ڤە رادگەهینین کو هەموو چالاکی و کارێن بنگەهێ لالش ب پشتەڤانییەکا بێ سنوور ژئالیێ رێزدار مەسرور بارزانی، سەرۆکێ حکومەتا هەرێما کوردستانێ ڤە دهێنە ئەنجامدان، و نڤیسینگهها جەنابێ وی د پهیوەندییەکا راستەوخۆ دایە دگەل دەستەكا بلند یا بنگەهی بۆ پێشکێشکرنا هەموو جۆرێن هاریکاریێ دا کو چالاکییێن بنگەهی ل هەموو دەڤەرێن ئێزدییان ب رێکا هەشت تا و بیست و پێنج نڤیسینگەهان بهێنە ئەنجامدان، دگەل نۆژەنکرنا ئاڤاهی و هۆلێن سەر ب بنگەهی ڤە.
زێدەباری دابینکرنا پشتهڤانییێن دارای یێن تایبهت بۆ وان چالاکییێن نموونهیی یێن بنگههـ ئهنجام ددهت، وهکی ڤیستهڤالێن سالانه و ئێکهمین کۆنفرانسێ نێڤدهولهتی یێ زانستی یێ کو پار سال ب هەڤکاری دگهل زانکۆیا دهۆکێ ل دۆر (ئێزدیاتی وەک ئۆل، دیرۆک، جوگرافیا و کەلەپوور) مە سازکری.
هەروەسا بەرهەڤییێن مە یێن نوکە بۆ گرێدانا دووەمین کۆنفرانسێ نێڤدهولهتی یێ زانستی ل دۆر (جینۆسایدا ئێزدییان؛ بیردانگ و دادپەروەری) یێ کو دێ ل دوماهیا هەیڤا نههـ یان دەسپێکا هەیڤا دەهـ یا ئەڤ سالە ئێتە ئەنجامدان.
هەروەسا ژ وان دەستکەفتێن ئەم د ڤێ خۆلا نهۆ دا شانازیێ پێ دکەین، ڤەکرنا کەنالێ ئاسمانی یێ (سەما)یە، داکو ببیتە مینبەرەک بۆ گەهاندنا دەنگ و پەیاما جڤاکێ ئێزدی، ئەو ژی ب فەرمان و پشتەڤانیا سەرۆکێ حکومەتا هەرێما کوردستانێ ڕێزدار مهسرور بارزانی.
هەروەسا، ڕاگەهاندنا پشتەڤانییا مادی یا تایبەت بۆ ڕزگاربوویێن ئێزدی، کو ب فەرمانا جەنابێ وی دهێتە ئەنجامدان و بنگەهێ لالش ب هەماهەنگی دگەل نڤیسینگەها جەنابێ سەرۆکێ حکومەتێ سەرپەرشتییا وێ دکەت، جهێ سوپاسی و پێزانینێن مەنە.
و ئەو دەستکەفتێن بنگەهـ د بوارێن رەوشەنبیری، ڤەکۆلین، جڤاکی، راگەهاندن، پەیوەندی، کاروبارێن قوتابیان و هاریکاریکرنا نڤیسەر و ڤەکۆلەران دا ئەنجام ددەت، ل بەر چاڤێن هەموویان دیارن و ل کەسی بەرزە نینن.
د دوماهییێ دا، ئەم وێ گۆتنا فەخامەتا سەرۆک و مەرجەع مەسعود بارزانی ب بیر دئینین کو دبێژیت: “هەر چەند هوین پتر خزمەتا جڤاکێ ئێزدی بکەن، ئەم دێ پتر پشتەڤانی و پالپشتیا بنگەهێ وە کەین.