ناڤەندا نووچەیان – سەما
میر حازم تەحسین بەگ، میرێ ئێزدییان ل کوردستان، عێراقێ و جیهانێ داخوازا پێدانا پۆستەکێ وزاری ل کابینا بێت یا حکومەتا عێراقێ بۆ ئێزدییان دکەت.
ب گۆڕەیی ڕاگەهاندنا نڤیسینگەها جڤاتی رۆحانی یا بلند یا ئێزدییان بەلاڤ کرییە، میر حازم تەحسین بەگ، میرێ ئێزدییان ل کوردستان، عێراقێ و جیهانێ و سەرۆکێ جڤاتا ڕۆحانی یا بلند یا ئێزدییان یێ بەردەوامە ل سەر بزاڤێن خۆ یێن رژد دگەل سەرۆک مەسعود بارزانی و عەلی ئەلزەیدی، سەرۆک وەزیرێ ڕاسپاردی یێ عێراقێ و دادوەر د. فایەق زێدان، سەرۆکێ جڤاتا بلند یا دادوەری، ب مەرەما دانا پۆستەکێ وزاری بۆ ئێزدییان د پێکهاتەیا حکومەتا بێت یا عێراقێ دا.
میرێ ئێزدییان گۆت: ” ئەم هەموو هەولێن خۆ دئێخینە گەڕ و ل سەر بلندترین ئاست کار دکەین دا کو پۆستەکێ وزاری بۆ ئێزدییان د کابینا بێت یا حکومەتا عێراقێ دا بێتە دابینکرن.”
زێدەتر گۆت: ب ڕێیا نڤیسارێن فەرمی ل گەل ئالییێن پەیوەندیدار هاتیە ئاخڤتینە دا کو مافێن ئێزدییان بێنە پاراستن و دادپەروەری ل گەل وان بێتە کرن.
ل داویێ دا ئاماژە ب وێ چەندێ کر، ئەم یێن گەشبینین ب وان ئالییێن مە پەیوەندی پێ کرین ب مەرەما دانا پۆستەکێ وزاری بۆ پێکهاتەیێ ئێزدی.