الحمدلله و شکر، ئەڤرۆ نە ڕۆژەک بوو د سالنامێ دا، ئەڤرۆ دەمەک بوو کو مە هەست پێ کر ئەسمان بۆ چەند دەمژمێران هاتە خارێ بۆ ناڤا گوندێ مە.
سەربلندیا هاتنا تاوسی
هاتنا تاوسی ئینانا دار و قوماشی نەبوو. د ئێزدیاتیێ دا تاوس نوورا زانینێ یە، هاتنا خێر و بەرەکەت و تەباییێ یە. سەربلندیا وێ نە تاج بوو، بار بوو. بارێ بەرپرسیارەتیێ کو ئەم ڕێیا شێخادی بپارێزین و داکۆکیێ ل سەر ئێکانەیا خودێ بکەین.
هەمی گوندی وێ ڕۆژێ بۆ ڕێزگرتنا تاوسێ پێخاوس بوون. پێخاوس هاتنە پێشیا وێ، و هەتا ژ گوندی دەرکەفت ژی هەر د پێخاوس دا مان. ئەڤ پێخاوسی نە لاوازی بوو، ئەو ڕێزگرتنا مەزن بوو بۆ تاوسی.
شەڤ و ڕۆژەکێ تاوس ل گوندێ مە ما و ب ڕێ و ڕەسم تاوس هاتەگێران
2. پرسینا حالێ گوندیان
قەوالا دەست ب قەولی نەکر، دەست ب پرسینێ کر، ئەڤە فەلسەفا مە یا هەرە کەڤنە: خودێ د دلێ بریندار دا دهێتە دیتن، نە د قەسران دا. پرسینا حالێ سێ تشت کرن:
• ئێش ناس کرن
• تۆرا دلان موحکەم کرن
• هەمی کەس وەک ئێک کرن ل بەر چاڤێ خودێ
3. قەول، دەف و شباب: سێیانا پیرۆز
ل ڤێرێ بابەت دگەهیتە دلێ خۆ. قەول بێ دەف و شباب وەک نامەیەکە بێ مۆر.
دەف چەرخیا گەردوونێ یە. لێدانا وێ دلێ مرۆڤی ڤەدگەرینیتە سەر ڕیتما ئەزەلی. دەما دەف لێ ددەن، ئەم نە گوهداریێ دکەین، ئەم دژین.
شباب پیرۆزە، هناسەیە بۆ هەر گوهدارەکێ. ئەو بایە یێ ژ گەلیێ لالش دهێت و د لێڤێن قەوالا دا دبیتە دەنگ.
موساحەبەت د ناڤبەرا وان دا چێبوو. قەوالا دگۆت، دەف بەرسڤ ددا، خەلک ب سروودان دگریا. ئەڤە نە کۆنسەرت بوو، ئەڤە دانوستاندنا ڕۆحی بوو. زارۆک ب لێدانا دەفێ فێری ڕیتما باوەریێ دبن، نە ب پەیڤان.
هەر وەسا بەحسێ فەڕزێن حەقیقەتێ و فەڕزێن تەریقەتا ئێزدیاتیێ هاتە کرن. پێدڤیە مرۆڤێ ئێزدی پتر داکۆکیێ ل سەر باوەریا خۆ بکەت، خودێ بناسیت و باوەری ب ئێکانەیا وى هەبیت.
4. شیرەت د ناڤ بێدەنگیێ دا
شیرەت د ناڤبەرا دوو لێدانێن دەفێ دا هاتنە گوتن: حەز ژ ئێک و دوو بکەن، ڕێزێ ل ئێک و دوو بگرن، خێر و خێراتێ بکەن، ئاگەهـ ژ هەژار و بەلەنگازان هەبیت. کەس ب مالێ دنیایێ ناچیتە دیوانا خودێ، کەس دوو قڕشان دگەل خۆ نابەتە گۆڕی، تەنیا باشی و قەنجی دێ بنە ملکێ مە ل ئاخرەتێ. ڕێزێ ل دایک و باب بگرن، دێ ل ئاخرەتێ سەربلند بن. ژ بەر هندێ ئەڤ گۆتن دچوونە دلێ هەمی گوهدارا دا وەک
نەسیحەتەک بوو: خودێ بناسە، نە ژێ بترسە. ناسین دبیتە ئەڤین، ترس دبیتە دووری.
5. سفرا پێکڤە (نانخارن )
هەمی گوندیان، هەر خێزانەکێ هیڤاری سفرا خۆ ئینا بەر تاوسی، و ئەم هەمی بێ جوداهی مە نانێ خۆ خار.
نانێ پێکڤە بوو پەیمانا مە یا بێ نڤیسین. ل سەر وێ سفرێ نە دولەمەند هەبوو نە هەژار. هەمیان ژ ئێک نانی خار، و ب وێ خارنێ مە گوت: ئەم ئێک جەستە نە.
6. خودێ ئێکە، بێ شەریکە
ئەڤ پەیڤە قەوالێن شێخادی د ناڤ سۆحبەتا خۆ دا گەلەک جاران داکۆکی لێ کر و هاتە دووبارەکرن. دەما هەمی دەنگ دبنە ئێک، مرۆڤ تێدگەهیت ئێکرێزی چاوا چێدبیت. ئەگەر خودێ ئێکە، ئەم نەشێین ببینە دوو.
7. خێرا دلان
خێر نە پارە بوو، بوو پاراستنا دەنگی. هەر دینارەکێ هاتە دان بۆ مالا شێخادی، واتە دەستەکێ دی دێ ل دەفێ دەت، لێڤەکێ دی دێ شبابێ ژەنیت. دڤیا ئەم ب سەر و مالێ خۆ ل بەر تاوسی و ڕێیا شێخادی راوەستین لەوا گوندیا هەمیا خێرا خو خرکرن و رادەستی قەوالا کرن .
. جلێن ڕەسەن
جلێن مە بوونە ئالا ، د هەر خەتەکێ کراسەکێ دا دیرۆکەک هەبوو.
نە تەنیا کچ و ژن ب کراسێن ڕەسەنێن ئێزدیاتی بوون، بەلکو زەلام ژی ب خەملا کەڤنارا ئێزدیاتی ب کوم و جەمەدانی و جلێن دێرین و کەڤنار – ئامادە بوون. زارۆک ژی، کچ و کوڕ هەمی، د خەملاندی بوون ب جلێن ئێزدیاتی.
ئەم ب وان جلان نەهاتینە جوانکرن، ئەم هاتینە ناسکرن..
9. دلخۆشیا سێ نەفشان
ژن دگۆتن، زەلام گوهداری دکرن، زارۆک ل سەر دەفێ دچوونە سەما. ئەڤ سێیانە تەمامیا ژیانێ یە. بێ ئێک ژ وان زیارەت ناتەمامە.
گۆڤەندا دەرێ کانیێ
دەرەنگی شەڤێ هەمی کچ و کوڕ بۆ دل خۆشی و تەناهیا وان ب هاتنا تاوسێ گۆڤەندا دەرێ کانیێ گێڕا، دەف و شباب هاتنە ژەنین و شاباش هاتنە کرن. سەقایەکێ گەرم و خۆش بوو وان خورت و کچا ل دەزتێ ئێک دیلانەکا گەرم گێران
تەناهی و ئارامی
براستی ڤێ تەناهیێ ئەڤ ڕۆژە ل مە خۆش کر ل کوردستانێ ڕەوشەک ئارام هەیە و تەنیا دلخۆشی مایە.
دوماهیک
ئەڤرۆ مە نە تەنێ تاوس پێشوازی کر، مە خۆ پێشوازی کر. مە دیت ئەم کینە: گەلەکێ کو قەولێ خۆ ب دەفێ دپارێزیت، نانێ خۆ پارڤە دکەت، و خودێ خۆ وەک ئێک دبینیت.
الحمدلله و شکر کو ئەڤ دەنگ نەمرە.
