ناڤهندا نووچهيان – سهما
ئيرۆ شەمبوويێ 30-5-2026، بهشێ ڤەکۆلینان ل بنگههێ لالش ل دهۆكێ و ب ئامادهبوونا د. سهعيد خودێدا، جێگرێ سهرۆكێ بنگههێ لالش، کۆمبوونەک ساز دا. ئەڤ کۆمبوونە تایبەت بوو ب چارچۆڤێ زانستی و بابهتى یێ پرۆژهيێ “ئینسکلۆپیدیا نڤیسەرێن ئێزدی”؛ کو پرۆژەیەکێ ديکیۆمێنتاری یە و ئارمانج ژێ ئەرشیفکرنا بەرهەمێن ڕهوشەنبیری و مەعریفی یێن نڤیسەرێن ئێزدی یە.
ئەڤ ئینسکلۆپیدیایه كار دكهت بۆ بەرهەڤکرنا ژێدەرەکێ گشتگیر کو ژیاننامەیا نڤیسەران و قۆناغێن وان یێن زانستی و ڕهوشەنبیری بخۆڤه دگرت، ل گەل سەرژمێريکرن و کۆمکرنا پەرتووک و بهرههمێن وان یێن ئەدەبی، هزری و زانستی، و دیارکرنا پشکداریا وان د بیاڤێن جودا یێن مەعریفەتێ دا. ئەڤە ژی دێ هاریكار بت بۆ ئاڤاکرنا بنکەیەکێ پێزانینان یێ تێر و تەسەل کو بزاڤا ڕهوشەنبیری یا ئێزدييان دکیۆمێنت بکەت و گەشەکرنا وێ د ناڤ ڕەوشا ڕوشەنبیری یا گشتی دا دیار بکەت.
د لێدوانەکێ دا بۆ کەنالێ “سەما”، داود خەتاری، بهرپرسێ بهشێ ڤهكۆلينان ديار كر، ئەڤ پرۆژەیە د چارچۆڤهيێ بزاڤێن دەزگەهی یێن بنکەیی دا دئێت بۆ دکیۆمێنتکرنا دەستکەفتێن هزری یێن ئێزدیيان ل سەر بنیاتەکێ ئەکادیمی. ناڤهاتی ئاماژە ب وێ چەندێ ژی کر کو ئەڤ ئینسکلۆپیدیایە پێنگاڤەکا جۆری یە بۆ پاراستنا بیرەوەریيا ڕهوشەنبیری و دابینکرنا ژێدەرەکێ گرنگ بۆ ڤەکۆلەران.
رۆنكر ژى، لژنهيا سەرپەرشتیيا پرۆژەیى بڕیار دا دهرفهتەکا زێدەتر کو دبتە هەیڤەک بدهتە وان نڤیسەرێن کو هێش پێزانین و داتایێن خۆ تەمام نەکربوون، ئەڤەژی بۆ زێدەکرنا گشتگیری و هووربینیيا ئینسکلۆپیدیایێ و پشتڕاستبوون ژ نیشاندانا ڕەوشا ڕهوشەنبیری یا ئێزدييان ب جوانترین شێوە.
ئەڤ پرۆژەیە د ناڤ ستراتیژیيا بهشێ ڤەکۆلینان دا دئێت کو ئارمانجا وى ديکیۆمێنتکرنا کەلەپۆرێ هزری یێ ئێزدیيانە، ل گەل بەرهەڤکرنا ژێدەرێن سەرەکی کو پالپشتیيا ڤەکۆلینێن تایبەتمەند بکەن، و هەبوونا بەرهەمێ مەعریفی یێ ئێزدی د ناڤەندێن ئەکادیمی و ڕهوشەنبیری دا بهێزتر بکەت.