ناڤەندا نووچەیان – سەما
ئیرۆ سێ شەمبێ، 9ـی حوزەیرانا 2026، بارەگەهێ بارزانی ڕاگەهاند؛ ل 41 هەمین سالیادا بۆردومانكرنا ئۆردۆگایێ زێوە ژ لایێ فرۆکەیێن ڕژێما بەرێ یا عێراقێ ڤە، سەرۆك بارزانی پەیامەک بەلاڤ کر. تێدا ئەو تاوانە ب لاپەرەیەکێ ڕەش ل دیرۆکا دوژمنان و ب خەمترین ڕۆژێن ژیانا خۆ وەسف دکەت و ڕادگەهینت، چارەنڤیسێ تاوانباران سەرشۆڕی بوو و سەرکەفتن ژی بۆ گەلێ کوردستانێ ما.
دەقێ پەیاما سەرۆك بارزانی ل سالیادا بۆردومانکرنا ئۆردۆگایێ زێوە:
ب ناڤێ خودایێ مەزن و دلۆڤان
د 9ـێ حوزەیرانا 1985ـێ دا، ڕژێما بەری نوکە یا عیراقێ تاوانەکا مەزن دژی گەلێ کوردستانێ ئەنجامدا. د وێ ڕۆژێدا، فرۆکەیێن ڕژێمێ ب شێوازەکێ دڕندانە كهمپا پەنابەرێن زێوە ل ڕۆژهەلاتێ کوردستانێ بۆردۆمانکر، و د ئەنجامێ وێ هێرشا نەمرۆڤانە دا سەدان ژن، زارۆك، پیر و گەنجێن بێگونەھ شەهید و بریندار بوون.
کارەساتا زێوە لاپەڕەکێ دی یێ خویناوی یە د کارنامەیا ڕەشا ڕژێما بەری نوکە یا عیراقێدا. ئەو ڕۆژە ئێك ژ خەمناکترین ڕۆژێن ژیانا من بوو. گریا دایکان و جەستەیێ سۆتی، شەهید و بریندارێن زێوە دل و دەروونێ هەر مرۆڤەکێ خودان وژدان دهەژاند.
مەرەما ڕژێمێ ژ تاوانا کۆمکوژییا زێوە و تاوانێن دی، شکاندنا ئیرادەیا پەنابەر، پێشمەرگە و خەباتکارێن کوردستانێ بوو. بەلێ ئەو تاوانە بوونە ئەگەر کو ئیرادەیا پێشمەرگەی و ڕۆلێ گەلێ کوردستانێ بۆ بەردەوامیدان ب خەباتا دژی ستەمکار و دەسهەلاتدارێن وێ گاڤێ یێن عیراقێ بهێزتر و ڕژدتر لێ بهێت. د ئەنجامێ وێ قوربانیدان و تێکۆشان و خەباتێدا، چارەنڤیسێ زالم و تاوانباران سەرشۆڕی و شکەستن بوو، و سەربلندی و سەرکەڤتن ژی بۆ گەلێ کوردستانێ ما.
د چل و ئێک سالییا کارەساتا زێوە دا، سلاڤان بۆ ڕۆحێ پاقژێ شەهیدێن زێوە و هەمی شەهیدێن ڕێکا ئازادیا کوردستانێ دهنێرین.
مەسعود بارزانی
9ـێ خزهیرانا 2026ـێ