ناڤەندا نووچەیان – سەما
بابێ شێخ، شێخ عەلی شێخ ئەلیاس، سەرەدانا مالا ئێزدییان ل باژێرێ ئۆلدنبۆرک ل وەلاتێ ئەلمانیا کر و ژ لایێ سەرۆکێ مالێ ئەلیاس یانچ و ئەندامێن دەستەیا ڕێڤەبەر و کارمەندان، دگەل چەندین کەساتییێن جڤاکی ب گەرمی هاتە پێشوازیکرن.
د دەستپێکا سەرەدانێ دا، ئەلیاس یانچ ب دلخۆشی ڤە پێشوازی ل بابێ شێخ کر و ڕاگەهاند کو ئەڤ سەرەدانا پیرۆز نیشانەکا گرنگا پشتەڤانی و خوەدی دەرکەفتنێ یە ژ جڤاکا ئێزدی ل ئەلمانیا، و ئاماژە ب هندێ کر کو ئەڤ سەرەدانە پەیوەندیا جڤاکی ب دەزگەهێن ئۆلی و کەلتوورێ وان یێ کەڤنار ڤە پتر بهێز دکەت.
د کۆمبوونێ دا، بابێ شێخ سلاڤ و ڕێزێن میر حازم تەحسین بەگ و ئەندامێن جڤاتا ڕۆحانی یا بلند یا ئێزدییان گەهاندنە ئامادەبوویان. هەروەسا دەستخۆشی و پەسنا کار و خەباتا مەزن یا مالێن ئێزدییان ل ئۆلدنبۆرک و هەموو باژێرێن دی یێن ئەلمانیا کر کو سالانە ب دلسۆزی بۆ خزمەتکرنا جڤاکا ئێزدی کار دکەن، کەلتوور و میراتێ ئۆلی دپارێزن و ناسنامەیا ئێزدیاین ل وەلاتێن دیاسپۆرایێ دپارێزن.
بابێ شێخ دیار ژی کر، ئەڤ سازییە پەیامەکا ئۆلی، نەتەوەیی و ڕەوشەنبیری یا گرنگ بجه دئینن، ئەو ژی ب ڕێیا ڤەکرنا خۆلێن تایبەت ل سەر ئۆلا ئێزدییان، وانەیێن ئۆلی بۆ زاڕۆک، گەنج و کچان، دگەل سازکرنا چالاکیێن جڤاکی و کەلتووری کو ئەڤە گرێدانا نفشێن نوو ب ئۆل، مێرات و بەهایێن وان یێن ڕەسەن پتر لێ دکەت.
ل داویا سەرەدانێ دا، بابێ شێخ دگەل قوتابییێن قوتابخانەیا ئۆلی یا سەر ب مالا ئێزدییان ڤە کۆمبوو و گوهداریا خواندنا وان یا قەول و دوعایێن ئۆلی کر، و سوپاسی و پەسنا ئاستێ وان یێ بلند د پاراستنا تێکستێن ئۆلی و فێربوونا ڕێنمایێن ئۆلا ئێزدییان دا کر.
پاشان بابێ شێخ چەندین شیرەت و ڕێنمایێن ئۆلی پێشکێشی قوتابییان کرن و گرنگیا پاراستنا بهایێن ڕۆحانی، تێگەهشتنا فەلسەفەیا ئۆلا ئێزدییان و ڤەگوهاستنا ئەڤی میراتێ کەڤنار ب ڕاستگۆیی و دلسۆزی بۆ نفشێن بیت دیار کر و گۆت کو ئەڤە بەرپرسیارەتییەکا هەڤپشکە دکەڤتە سەر ملێ هەموو جڤاکا ئێزدییان.
