ناڤهندا نووچهيان – سهما
ل زانکۆیا دهۆک، ب هەڤکاری ل گەل ئەنجومەنێ بالا یێ خانمان و گەشەپێدانێ، ڕێوڕەسمەک بۆ ساخکرنا ڕۆژا جیهانی یا نەهێلانا توندوتیژیا جهسهدى و سێكسى د ناڤبەر شەڕان دا هاتە ل دار خستن، کو دروشمێ سەرەکی یێ ڕێورەسمێ تایبەت بوو ب ئێزديیان ڤە ل ژێر ناڤێ: ”ب بیرئینانا جینۆسایدا ئێزديیان ژ دانپێدانێ بەر ب شیانپێدانێ، دادپەروەری و چارەسەریيێن بەردەوام“.
پ. هـ. د. داود سلێمان ئەتروشی ڕاگەهاند کو ئەڤ کۆمبوونە بۆ ڕاوستانێ یە ل سەر ئێک ژ بئازارترین لاپەرێن دیرۆکا هەڤجەرخ کو ئەو ژی جینۆسایدا ئێزديیانە. وەک هەلوهستەکێ کریاری ژی، ئاماژە ب هندێ کر کو دامەزراندنا (پەیمانگەها چارەسەريیا دەروونی و تروامایا دەروونی – IPP) د ناڤ زانکۆیێ دا، ئێک ژ گرنگترین دەستپێشخەریێن پشتى جینۆسایدا ئێزدیيان بوو بۆ خزمەتکرنا قوربانیيان.
د. خانزاد ئەحمەد بەحسا کارێ هەڤپشک یێ دامەزراوەیێن حکومەتێ و ڕێکخراوێن جڤاکێ سڤیل و ناڤدەولەتی ل گەل تۆڕێن قورتالبوویان ل دەڤەرێن جودا ژ شاریا بگرە تا دەشتا نەینەوا و شنگالێ کر بۆ دابینکرنا پشتەڤانییا یاسایی، دەروونی و ئابۆری. هەروەسا دەرکرنا یاسایا قورتالبوویان وەک پێنگاڤەکا مێژوویی ب ناڤ کر بۆ دانپێدانا ب مافێن وان و ئەرکدارکرنا دەولەتێ بۆ دابینکرنا قەرەبووکرنێ.
د دووماهیا ڕێورەسمێ دا، پانێلەک ل ژێر ناڤونیشانێ “چاکبوون ل پشت ڕزگاربوونێ” ب پشکداریيا بەرپرسێ دەستەكا بلند یا بنگەهێ لالش (سەعید جردۆ) و ڕێڤەبەرا سەنتەرێ خواندنێن جێندەری (دلین سەردار)، و چالاکڤان (ناڤین سمۆقی) هاتە پێشکێش کرن، کو تێدا ب هووری بهحس ل ڕەوش و پاشەڕۆژا قورتالبوویێن ئێزدی هاتە کرن.
