سه‌ما
ڕێکخەرێ ڕاسپاردەیێن نێڤدەولەتی دووپاتکر، یاسایا پاراستنا مافێ پێکهاتەیان ژمارە (5) یا سالا 2015 ل هەرێما کوردستانێ دان پێدانێ ب پێکهاتەیێن ئایینی و نەتەوەیی دکەت کو ل هەرێما کوردستانێنە ژ وانژی زەرەدەشتی، هەروەسا ئێزدیی ژی نەتوەیێ کورد یێ ڕەسەنن و ژ ڕوویێ ئایینیڤە د یاسایا ژمارە 5 یا سالا 2015 دانپێدان پێ هاتیە کرن.
دیندار زێباری، ڕێکخەرێ ڕاسپاردەیێن نێڤدەولەتی، دەربارەی ڕۆنشتنا ڕۆژا دووێ یا ڕۆنشتنا دانوستاندنێن لژنەیا نەتەوەیێن ئێکگرتی تایبەت ب نەهێلانا ڕەگەزپەرستییێ ل ژنێف، ڕۆهنکرنەک بەلاڤکر و ئاماژە کریە، ئيرۆ تێبینی ل سەر ناساندنا ئایینێ زەرەدەشتی و دانپێدانکرنێ هەبوو، ڕۆهنکرنا ئەوان ل سەر ئەوی بنەمایی بوو کو یاسایا پاراستنا مافێ پێکهاتەیان ژمارە 5 یا سالا 2015، ل هەرێما کوردسیتانێ دانپێدان ب پێکهاتەیێن ئایینی و نەته‌وەی دکەت کو ل هەرێما کوردستانێنە ژ ئەوان ژی زەرەدەشتی.
دەربارەی ئێزدییان د ڕۆهنکرنێدا هاتیە، د گۆتارا حکومەتێ هەرێمێ ژی دا کو دوهی پێشکێشکریەب ب تێر و تەسەلی باس ل پێکهاتەیا ئێزدییان کریە وەکو ئایین، هەروەسا ئەو ئازارێن کو د دەستێن داعش دا دیتین و بزاڤێن حکومەتا هەرێما کوردستانێ بۆ ڤەحەواندن و هاریکاریکرنا وان و ڕزگارکرنا ڕەڤاندییان و چارەسەرکرنا وان ل دەرڤە.
ڕێکخەرێ ڕاسپاردەیێن نێڤدەولەتی ئاماژەکریە ژی، ل ڕۆژا دووێ یا ڕۆنشتنا دانوستاندنێن لژنەیا نەتەوەیێن ئێکگرتی باس ل خواندنا ئێزدییان کریە، هەروەسا باس ل پشتەڤانیکرن و دیکیۆمێنتکرنا کەسێن وان و ب جینۆساید دانەنیاسینا ئەوان تاوانێن د دەرهەقێ ئێزدینان دا هاتینە کرن کر.
هەڤدەم دووپاتکریە، کو ڕۆهنکرنا ئەوان یا ئيرۆ ل ڕۆژا دووێ د بابەتێ پێکهاتەیان دا دەربارەی پرسیارەکا تایبەت بوو ب زەرەدەشتیان کو ل هەرێما کوردستانێ دانپێدان پێ هاتیە کرن.
ناڤهاتی گۆتیە ژی:”خوشک و برایێن ئێزدی وەک نەتەوە، کوردێن ڕەسەنن و ژ ڕوویێ ئایینیڤە د یاسایا ژمارە 5 یا سالا 2015 دانپێدان پێ هاتیە کرن، هەروەسا ژ روویێ کارگێریی ڤە ڕێڤەبەرییەک ل حکومەتا هەرێمێ و سەرپەرشتییا خواندنا ئێزدییان دکەت و ماددەیێ ئێزدییاتییێ دهێتە خواندن ل ئەوان دەڤەران یێن کو پڕانییا ئاکنجییێن وان ئایینێ ئێزدینە”.
دیندار زێباری، دەربارە ئێزدییان دیارکر ژی، ڕێڤەبەرییا گشتی یا کاروبارێن ئێزدییان ل وەزارەتا ئەوقاف و کاروبارێن ئایینی یا هەرێما کوردستانێ هەیە بۆ سەرپەرشتیکرنا کارێن وان.