ناڤهندا نووچهیان – سهما
د چارچۆڤێ بزاڤێن بهردهوام یێن بابا شێخ “شێخ عهلى شێخ ئهلياس” بۆ پاراستنا تهباييا جڤاكى و ئاشتیێ ل دەڤەرێن ئێزدييان، پێكهاتنا جڤاكى دناڤبهرا چهندين مالباتان دا هاته ئهنجامدان و داوى ب ئالۆزى و كێشهيێن وان يێن جڤاكى هات.
د سهرهدانا خۆ يا چهند ڕۆژى دا بۆ شنگالێ، بابا شێخ جودا جودا ل گهل پترى شهش مالباتێن شنگالێ جڤيا و ل سهر دهستێ وى ههڤنێزيكبوون دناڤبهرا واندا هاته كرن و كێشهيێن جڤاكى ب ئامادهبوونا ههردوو ئالييان و كهسايهتى و خهلكێ دهڤهرێ چارهكرن و پێكهاتن ڕاگههاندن ل دووڤ عورف و نەریتێن ئێزدیاتیيێ، کو تێدا هاتە ڕاگەهاندن لاپەرێن ئالۆزيێن بەری نۆکە هاتنە گرتن و لاپەرەکێ نوو ل سەر بنەمایێ لێبۆرین و لێکگەهشتنێ هاتە ڤەکرن.
سهباح سمێر، بهردهڤكێ بابا شێخ بۆ سهما دياركر، دڤان ڕێورهسمێن ڤێ ئاشتهواييێ دا بابا شێخ دوپاتى ل سهر هندێ كر كو جڤاكێ ئێزدى ب چ ڕهنگهكى پشتەڤانييا چ تومهتبار و تاوانباران د كێشهيێن كوشتنێ دا ناكهت و پێدڤييە ياسا سهروهر بت و هەر كهسێ تاوانەكێ ئهنجام بدەت سزايێ خۆ يێ ياسايى وهرگرت دا كو مافێ قوربانيان بێتە پاراستن و دادپەروەرى دناڤ جڤاكى دا بچەسپت.
گۆتژى: بابا شێخ دوپاتكر كو د چ كێشهيێن جڤاكى دا نابت ژن و زارۆك ببنە پشكەك ژ ململانێيان يان ببنە قوربانى و پێدڤييە خێزان ژ ڤان ئالۆزيان دوور بن و دناڤ تهباييێ دا بژین.
بهردهڤكێ بابا شێخ باس ل وێ يهكي ژى كر، بزاڤێن بابا شێخ يێن جدی دبەردەوامن بۆ چارەكرنا هەموو كێشەیێن دی یێن ماین ب هەڤكاريا خێرخواز و كەسێن دلسۆز و ل داوييێ ژى سوپاسييا ههموو ئەوان كەسان كر یێن كو د ڤان بزاڤێن ئاشتهواييێ دا هاریكار بووین، دا کو ئارامی بۆ ناڤ جڤاکی بزڤرت.
ل ڕێككهفتى 7-3/10-2026، بابا شێخ و دگهلدا پێشيمامێ بابا شێخ و بابا گاڤان بۆ چهند پێكهاتنێن جڤاكى سهرهدانا شنگالێ كربوون.