ناڤەندا نووچەیان – سەما
جڤاتا ئێزدیيێن سووریێ بانگهوازييهكا مرۆڤى و بلهز ڕابهرى خێرخواز، سەرمایەدار، بەرپرس، سازی و کۆمەلێن ئێزدييان ل ناڤخۆ و دەرڤەی وەلاتی دکەت، بۆ هانا چۆنا پەنابەرێن ئێزدييێن ڕۆژئاڤايێ كوردستانێ ل کەمپا “مام ڕەشان” ل هەرێما کوردستانێ، کو د ڕەوشەکا ب زهحمهت و دژوار دا دژین.
ل دووڤ بەیاننامەیا جڤاتا ئێزدیيێن سووریێ، کو دوهى ڕۆژا ئينيێ 26ـى حوزەیرانا 2026 بهلاڤ كرييه و تێدا هاتييه، هێشتا ب دەهان پەنابەرێن ئێزدی یێن ڕۆژئاڤايێ كوردستانێ پشتی سالێن درێژ ژ ئاوارەییێ ل کەمپا مام ڕهشان ل قهزا شێخان پارێزگهها دهۆكێ ماینە و ڕەوشا وان يا مرۆڤى و دهبارا ژيانێ ڕۆژ بۆ ڕۆژێ بەرەف خرابتربوونێ دچت.
ل کەمپێ ڤێگاڤێ 53 خێزان ماينه، کو ههژمارا کەسێن وان دگەهتە نێزیکی 200 کەسان، د ناڤ وان دا 47 قوتابيیێن قوتابخانە و زانکۆیان هەنە، کو بهردهوامييێ ب خواندانا خۆ ددهن سەرەڕای ڕهوشا ئابۆری یا دژوار، هەر قوتابیيەک نەچارە ههيڤانه کرێیا خواندنێ بدەت، زێدەباری تێچوون و پێتڤیاتیيێن دی یێن خوندنێ، ئەڤە ژی بارەکێ گرانە ل سەر ملێ وان خێزانێن کو چ ژێدەرێن جێگیر یێن داهاتی نینن.
ئەم ڤێ گازیيێ ڕابهرى کەساتیيێن خودان شیان یێن ئێزدی، سەرمایەدار، بەرپرس، سازی، کۆمەل و مالێن ئێزدیيان ل ناڤخۆ و دەرڤەی وەلاتی دکەین، كو ڕاوەستان دگەل ڤان خێزانان د ئیرۆ دا تەنێ کارەکێ خێرخوازی نینە، بەلکو ئەرکەکێ مرۆڤاتی و ئەخلاقی یە بەرامبەر مرۆڤێن کو نەچار بووینە مۆلك و مالێن خۆ بهێلن و هێشتا ل چاڤەڕێیا ژیانەکا ب کەرامەت و ئارامن بۆ زارۆکێن خۆ.
ژبۆ دادپەروەریيێ و وەفاداریيێ بۆ ڕاستیيێ، ئاڕاستەکرنا ڤێ گازیيێ چ ڕامانێن وێ چەندێ نادەت کو ئەو لایەنێن ئەم ئیرۆ گازیێ ژێ دکەین د ئەرکێن خۆ دا کەمتەرخەم بووینە یان پێشتر هاریکاری پێشکێش نەکرینە. بەروڤاژى، ئێزديیان ل عێراقێ، و حکومەتا هەرێما کوردستانێ، و چەندین سازی و لایەنێن خێرخوازی، و د پێشەنگیيا وان دا دەزگەهێ خێرخوازی یێ بارزانى، زێدەباری کەساتی و تاکێن جڤاکێ ئێزدی، دەستێ هاریکاریێي درێژ کرینە بۆ ب دەهان خێزانێن کوردێن سوری یێن ئاوارە ل هەرێمێ.
بەردەوامبوونا ئازارێن خێزانێن ل کەمپا مام ڕەشان دژین، و ئالۆزبوونا ڕهوشا وان یا ئابۆرى و مرۆڤاتی، ئیرۆ پێدڤی ب چارەسەریيەکا گشتگیر و بەردەوامتر هەیە، کو ل سەر ڤان چارەسەریێن دهمى ڕا ببۆرت، و بۆ ڤان خێزانان ژیانەکا ب کەرامەت و پاشەڕۆژەکا جێگیرتر مسۆگەر کەت، ب تایبەتی بۆ زاڕۆك و گەنجێن وان.