ل ساڵیادا دامەزراندنا پارتی و سالڕۆژا ژدایكبوونا سەرۆک بارزانی، مەسرور بارزانی، جێگرێ سەرۆكێ پارتی، پەیامەک بەلاڤکریە ئەڤا ل خوارێ دەقێ وێ یە:
ب هەلكەفتا 78 ە مین ساڵڤەگەڕا دامەزراندنا پارتی دیموكراتی كوردستان و ساڵڤەگەڕا ژ دایكبوونا سەرۆك و رێبەرێ نیشتیمانێ مە، جەنابێ سەرۆك بارزانی گەرمترین پیرۆزباهیان ل جەنابێ سەرۆك بارزانی و هەموو ئەندام و لایەنگرێن پارتی و بنەمال و كەس و كارێن سەربلندێن شەهیدان و ئەنفالكریان و پێشمەرگێن قارەمان و كوردستانیێن نیشتیمانپەروەر دكەم.
پارتی هەر ل ئێکەم ڕۆژا دامەزراندنا وێ ل سەر دەستێ ڕابەرێ بزاڤا ڕزگاریخوازا کورد بارزانیێ نەمر، هەردەم قوتابخانا کوردایەتی و نیشتیمانپەروەری و حزبا هەموو تەخ و پێکهاتەیێن جودایێن کوردستانێ بوویە.
پارتی خودانێ مێژوویەکا پڕی سەروەری و فیداکاری و بەرگریکرن ل مافێن نەتەوەیی و نیشتمانی یێن گەلێ کوردستانێ یە و ئەڤرۆژی ژبەر سەرکردایەتیا دویربینانە و ژێهاتی یا جەنابێ سەرۆکی و دلسۆزی و هەدارا ئەندام و جەماوەر و لایەنگرێن پارتی، پارتا مە ئێکە ژ مەزنترین و بهێزترین و کاریگەرترین حزبێن کوردستان و عێراق ودەڤەرێ و رۆلەكێ گرنگ و كارا د پاراستنا قەوارێ دەستووری و بدەستڤەئینانا دەستكەفتێن نیشتیمانی یێن خەلكێ كوردستانێ دا هەیە، پارتی تاکە ئومێدا خەلکێ کوردستانێ یە كو رێكێ نادەت پیلانێن لاوازكرنا قەوارێ هەرێما كوردستانێ سەربگریت و بەرەڤانیكەرەكا دژوار دبیت بۆ وێ یەكێ بەرەڤانیێ ژ ئاخ و مافێن خەلكێ كوردستانێ بكەت، چاڤەڕێینە ئەندام و لایەنگرێن پارتی، ب هەموو دلسۆزیێ، بەشداری د هەلبژارتنێن پەرلەمانێ کوردستانێ دا بکەن بۆ هندێ وەکو هەردەم، پارتی هێزا ئێکەم و پیشەنگا کوردستانێ بیت، ژبەرکو سەرکەفتنا پارتی، سەرکەفتن و پێشکەفتن و ئاڤەدانیا کوردستانێ یە.
ل ساڵڤەگەڕا 16ى تەباخێ و ساڵڤەگەڕا دامەزراندنا پارتی، سلاڤ ل دامەزرێنەرێ پارتی، بارزانیێ مستەفا و سەركردەیێ هەردەم ل یاد ئیدریس بارزانی و هەموو شەهیدێن رێیا ئازادییا كوردستانێ.