ناڤهندا نووچهيان – سهما
جڤاتا وەزیرێن هەرێما کوردستانێ ب سەرپەرشتيیا مەسرور بارزانی، سهرۆكێ حكومهتا ههرێما كوردستانێ کۆم بوو و چەند بڕیارێن گرنگ د بەرژەوەندیيا وەلاتییان دا دەرکرن.
ئيڕۆ چارشەمبێ، 22ی تەمموزا 2026ێ، ب سەرپەرشتیيا مەسرور بارزانی، سەرۆكێ حكومهتا هەرێما کوردستانێ، کۆمبوونا جڤاتا وهزيران ب ڕێڤهچۆ و تێدا چەند بڕیارێن نوو د بەرژەوەندیا وەلاتییان دا هاتنه دەرکرن.
دەربارەی هوورکاریێن بڕیاران، ژێدهرهكى بۆ مالپهرێ كوردستان 24 ڕاگههاند، د کۆمبوونێ دا دا بڕیار هاتە دان کو لێخۆشبوون ژ سزایێن سەرپێچیا هاتنوچۆیێ ب ڕێژەیا 20% هەتا 31ی مەها 12 یا ساڵا 2026ێ بێته درێژکرن.
هەروەسا ئاماژه ب وێ چهندێ دا، ههڤپشكێن قهرێن کارەبێ چ ل سهر وەلاتی ب خۆ بن یان ئەڤێن پڕۆژەیێن چاندنێ (کشتوکاڵی) هەین، ئەگەر قەرێ وان یێ بەرێ دەستپێکرنا پڕۆژەیێ “ڕووناکی” بت، ئەڤە ب ڕێژەیا 50% داشکاندن دێ بۆ وان ئێتە کرن.
رۆنكر ژى، ئەڤێن قەرێن کارەبا پڕۆژەیێن پیشەسازی، بازرگانی، گەشتوگوزار یان کارگەهان ل سەر بن، داشکاندنا 25%ێ دێ بۆ وان ئێتە کرن, تێ زانين جێبەجێکرنا ڤان بڕیاران بۆ ماوەیێ ئێک مەهـ ژ ڕۆژا دەرچۆنا وان دێ کاری پێ هێتە کرن.
کابینەیا نەهێ یا حکومەتا هەرێما کوردستانێ د چەند سالێن بۆری دا بەردەوام هەوڵ دایە ئاسانکاریێ بۆ وەلاتییان بکەت و بارگرانیا دارایی ل سەر ملێن وان کێم بکەت، بەرێ ژی چەندین جاران بڕیارا لێخۆشبوونا سزایێن هاتنوچۆیێ و داشکاندنا قەرێن ئاڤ و کارەبا و پێشینەیێن دیتر هاتینە دەرکرن.
درێژکرنا ماوەیێ لێخۆشبوونا 20% یا سزایێن هاتوچۆیێ دەرفەتەکا نوویە بۆ وان شۆفێران ئەڤێن نكارين د ماوەیێ بۆری دا سزایێن خۆ بدەن، ژ ئاليهكێ دی ڤە، پڕۆژەیێ ڕووناکی بۆ دابینکرنا کارەبا 24 دەمژمێری ل زۆربەی ناڤچەیێن هەرێما کوردستانێ چۆیە د بياڤێ جێبەجێکرنێ دا، لهوران پاکتاوکرنا قەرێن کەڤن یێن کارەبایێ ب داشکاندنەکا مەزن ڤه، هاندەرەکێ ب هێزە بۆ وەلاتییان و خودان کاران داکو قەرێن خۆ بزڤڕینن و مفايى ژ وێ خزمەتگوزاریا نوو وەربگرن.