ناڤەندا نووچەیان – سەما
ئیرۆ ڕۆژا ئینیێ، 10ی تەمموزا 2026، ب چاڤدێری و ئامادەبوونا بابێ شێخ” شێخ عەلی شێخ ئەلیاس” پێکهاتنەکا جڤاکی د ناڤبەرا مالباتا عەلی حەربا، ژ پشکا بابیر کالکا یا سەر ب هۆزا قیرانییان ل سێباشێخدری ل قەزا شنگالێ و مالباتا ئەلعەلی ئەلسەغیر، ژ هۆزا لویزی هاتە کرن.
ئەڤ پێکهاتن ل سەر ئەوێ ڕوودانا دلتەزین یا هاتنوچۆنێ ئەوا ل سەر ڕێیا د ناڤبەرا تەلەعفەر و شنگالێ دا ڕوودایی، و ببوو ئەگەرێ گیان ژ دەستدانا (مەحمود نافخۆش، حەنیفە نافخۆش، و کچا وان مەلینا مەحمود).
هژمارەکا کەساتییێن ئێزدی، دگەل ئامادەبوونا بەرفرەها سەرۆک هۆز، ڕیهسپی و کەساتییێن جڤاکی یێن ئێزدی، و ل سەر ئاستەکێ دی ژی چەندین شێخ و ڕیهسپیێن هۆزێن عەرەب و کەساتییێن جڤاکی پشکدار بوون.
پێکهاتن ب گەهشتنا ڕێککەفتنەکا فەرمی یا پێک هاتنێ د ناڤبەرا هەردو ئالییان دا ب داوی هات ب گۆڕەیی دابونەریتێن ئێزدیاتییێ، کو تێدا هاتە ڕاگەهاندن لاپەرەیێ ناکۆکیێ هاتە گرتن و لاپەرەیەکێ نوو یێ ئاڤا ل سەر لێبۆرینێ هاتە ڤەکرن.
ئەڤ پێک هاتنە د چارچۆڤێ وان بزاڤان دا دئێت یێن کو ئارمانج ژێ بهێزکرنا ئاشتییا ناڤخۆیی و جێگیرکرنا بەرقەرارا جڤاکی یە د ناڤا جڤاکێ ئێزدی و دگەل پێکهاتەیێن دی دا، کو تێدا ئامادەبوویان تەکەز ل سەر گرنگیسا ڕۆلێ هۆزان و جڤاکی کر د چارەسەرکرنا ناکۆکییان و پاراستنا ئێکڕێزیا جڤاکی دا.
ل داوییا پێکهاتنێ، بابێ شێخ سوپاسی و پێزانینێن خۆ ڕابەری هەموو وان کەساتی و ڕیهسپییان کر یێن کو پشکدار بووین د سەرخستنا ڤێ دەستپێشخەرییێ دا، و دەستێ خۆ تێدا هەین بۆ ب داوی ئینانا ناکۆکییێ و پێکئینانا پێکهاتنێ د ناڤبەرا هەردو ئالییان دا.