ناڤەندا نووچەیان – سەما
ئێدی تورکیا خودان دیتنەکا جودایە بۆ پێکهاتەیان، ب تایبەت بۆ جڤاکا ئێزدی. ئەنقەرە دخوازت هەموو پێکهاتەیان د هەمبێزا خۆ دا ب حەوينت؛ د ڤێ چارچۆڤهیێ دا و د پێنگاڤا ئێکێ دا، پڕۆژەیەکێ مەزن بۆ نووژەنکرنا مەزارگەهێن ئێزدیيان هاتیيە ڕاگەهاندن کو دەستپێکا وێ ب دانانا بەڕێ بنیاتی بۆ مەزارێ “شێخ هەڤند” بوو.
ب ئامادەبوونا میرێ ئێزديیان، میر حازم تەحسین بەگ، و هەڤژینا میرێ ئێزديیان، مەیان خاتوون، و ئۆلدار و ڕاوێژکارێن میری، کەساتيیێن جڤاکی یێن ئێزدی و ژمارەکا مەزنا ڕەڤەندا ئێزدی ل دیاسپۆرایێ، ل گەل پشکداریيا بەرپرسێن بلند یێن حکومەتا تورکیا (وەک وەزیرێ وەرزش و لاوان، جێگرێ وەزیرێ کەلتوور و گەشتوگۆزارێ، والی، قایمقام، پەرلەمانتار و کەساتیيێن حزبی)، بەڕێ بنیاتی بۆ مەزارێ شێخ هەڤند ل ناوچەیا بشێریيێ یا سەر ب ویلایەتا باتمانێ ڤە هاتە دانان.
د ڤێ سەرەدانێ دا، میرێ ئێزدیيان میر حازم تەحسین بەگ سوپاسیيا گەل و حکومەتا تورکیا کر و ڕاگەهاند، ئەڤ وەلاتە یێ هەموو پێکهاتەیانە. وی دوپاتكر کر کو ئێزدی بەشەکێ ڕەسەن و ڤەنەقەتیایی يێ ڤی وەلاتینە و نە مێڤانن.
هەروەسا ئاماژە ب هندێ کر، پێدڤیيە کەشوهەوایەکێ گونجايى بۆ ئێزدیيان بێتە ڕەخساندن دا کو ب ئازادانە ڕێورهسمێن خۆ یێن ئۆلى ب ڕێڤەببەن، و داخواز کر کو د دەستوورێ تورکیا دا ب فەرمی دانپێدان ب ئۆلا ئێزدييان بێتە کرن.
ژ لایێ خۆ ڤە، بەرپرسێن حکومەتا تورکیا پشتگیری ل پەیاما میرێ ئێزدیان کر و دیار کرن، کو ئێدی تورکیا وەلاتێ هەموو پێکهاتەیانە، ب ڕێزەکا مەزن تەماشەی هەموویان دکەن و دێ بەردەوام بن ل سەر پشتەڤانیکرنا جڤاکا ئێزدی.
پاشان میرێ ئێزدیيان سەرەدانا چەند گوندێن ئێزدیيان ل دەڤەرا خالتان (وەک شمزێ، قورغێ، شاسمێ و فەقیرا) ل باتمانێ و گوندێ (داودیيێ) ل دەڤەرا چنار یا سەر ب دیاربەکرێ ڤە کر. وی ژ نێزیکڤه تهماشهى ڕەوشا گوندان کر، گۆهداری ل داخوازى و ئاریشهيێن وەلاتیان کر و ڕاگەهاند کو دێ دەنگ و پەیاما وان گەهینتە ئالييێن پەیوەندیدار.