مەسرور بارزانی: پارتی ئەندازیارێ ڤەژاندن و پێشکەڤتنا کوردستانێ نە
ناڤەندا نووچەیان – سەما
جێگرێ سەرۆکێ پارتی دیموکراتی کوردستان ڕاگەهاند: پارتی و سەرۆک بارزانی گەرەنتییا پاراستنا ئاساییش، سەقامگیری و قەوارەیێ دەستووری یێ هەرێما کوردستانێنە و هەردەم جهێ ئۆمێد و باوەرییا خەلکێ نە.
مەسرور بارزانی، جێگرێ سەرۆکێ پارتی دیموکراتی کوردستان، ب ب هەلکەفتا 16ـی تەباخێ، سالڕۆژا ژ دایکبوونا سەرۆک مەسعود بارزانی و 80هەمین سالیادا دامەزراندنا پارتی، گەرمترین پیرۆزباهی ڕابەری سەرۆک بارزانی، بنەمال و کەسوکارێ سەربەربلندێن شەهیدان و ئەنفالکریان، پێشمەرگەیێن قارەمان، ئەندامان و لایەنگرێن پارتی و سەرجەم خەلکێ کوردستانێ کر.
دەقێ پەیاما مەسرور بارزانی، جێگرێ سەرۆکێ پارتی دیموکراتی کوردستان ب هەلکەڤتا 16ــی تەباخێ:
ب هەلکەڤتا 16ـی تەباخێ، سالرۆژا ژ دایکبوونا ڕێبەر و سەرکردەیێ مە یێ نیشتیمانی و بابێ من یێ خۆشتڤی جەنابێ سەرۆك بارزانی و 80ـێ سالییا دامەزراندنا پارتی دیموکراتی کوردستان، گەرمترین پیرۆزباهی ل جەنابێ سەرۆك و مالبات و کەسوکارێن سەربلندێن شەهیدان و ئەنفالکریان و پێشمەرگەیێن ئازا و قەهرەمانێن کوردستانێ و ئەندام و لایەنگر و دۆستێن پارتی دیموکراتی کوردستان و هەموو کوردستانیان دکەم.
بیرەوەرییا دامەزراندنا دێرینترین و مەزنترین و بهێزترین پارتا کوردستانێ ل سەر دەستێ ڕێبەرێ دیرۆکی و بابێ روحی یێ گەلێ مە مستەفا بارزانییێ نەمر، ئێکە ژ ڕۆناهیدەرترین ڕۆژ و بیرەوەرییێن دیرۆکی یێن گەلێ مە.
پارتی دیموكراتی كوردستان، ل بن سیبەر و ڕابەرایەتییا سەرۆك مەسعود بارزانی، درێژەپێدەرا ڕێبازا پیرۆز یا بارزانییێ نەمرە و بەردەوامە ل سەر تۆمارکرنا داستان و دەستکەڤتێن مەزن و دیرۆکی کو جهێ شانازییا هەموو کوردستانیەکێ دلسۆزە.
پارتی و سەرۆك بارزانی، هیڤی و ئومێد و جهێ باوەرییا خەلکێ کوردستانێ و گەرەنتییا پاراستن و پێشخستنا ئاسایش و ئارامییا قەوارەیێ دەستووری یێ هەرێما کوردستانێ و کلتوورێ پێکڤە ژیانا ئاشتیانە یا دناڤبەرا پێکهاتەیێن کوردستانێ و ئەندازیارێ ڤەژاندن و دانانا بنیات و پێشکەڤتنا کوردستانێنە.
ل سالڤەگەرا 16ـی تەباخێ، ب بلندی و ڕێز و پێزانینێن کوور ڤە، بیرەوەرییا دامەزرێنەرێ پارتی، بارزانییێ نەمر و کاك ئیدریسێ هەردەم ل بیر و سەرکردە و گشت خەباتکار و شەهیدێن کوردستانێ دکەین.
هەردەم بلند بیت بیرەوەرییا 16ــی تەباخێ.
مەسرور بارزانی
جێگرێ سەرۆکێ پارتی دیموکراتی کوردستان
2026/8/16