ناڤهندا نووچهیان – سهما
ئيرۆ دوشەمبێ، 3ـی 2026، نێچیرڤان بارزانی، سەرۆکێ هەرێما کوردستانێ ل دوازدەهەمین سالیادا تاوانێن جینۆساید و کۆمکوژیيا ئێزدییان، پەیامهك بهلاڤ كر و تێدا هاتييە، ئەرکێ حکومەتا عێراقێ يه ئاسایيش و ئاڤەدانييێ بۆ شنگالێ ڤهگهڕينت و هێزێن نهیاسایی دەرێخت. گۆتژى: بزاڤێن مه بۆ ڕزگارکرنا تهڤايا ڕهڤاندييێن ئێزدی و ب جینۆسایدناساندنا تاوانێن داعش ل سەر ئاستێ جیهانێ د بەردەوامن.
دەقێ پەیاما نێچیرڤان بارزانی:
ئەڤرۆ ب خەم و ئازارەکا کویرڤە، بیرەوەریا 12 ساڵییا تاوانا جینۆساید و کۆمکوژییا هاوولاتیێن مە یێن ئێزدی دکەین.
د ڤێ بیرەوەریا ب ئازاردا، سەرێ رێزێ ل بەرامبەر گیانێ پاقژێ شەهیدان دچەمینین و ب هەمی رێز و وەفاداریڤە وان ب بیر دئینین.
تاوانا جینۆسایدکرنا ئێزدییان و ب کەنیزەکرنا کچ و ژنێن وان و تێکدانا مال و پەرستگەهێن وان، برینەکا ڤەکری یا دل و دەروونێ گەلێ کوردستانێیە.
مخابن هاولاتیێن مە یێن ئێزدی پشتی دوازدە سالان، هێشتا باجا ناکۆکیێن سیاسی و هەبوونا هێزێن چەکدارێن نەیاسایی ددەن.
ل ڤێرە جەختێ دکەین کو ئەرکێ حکومەتا عێراقا فدرالە ئارامی و ئاڤەدانیێ بۆ شنگالێ بزڤرینیت، رێککەفتنا ئاساییکرنا رەوشا شنگالێ دگەل حکومەتا هەرێما کوردستانێ جێبەجێ بکەت، کار بۆ پارێزگەهکرنا وێ بکەت و هێزێن نەیاسایی ژ دەڤەرێ دەرکەڤن؛ دا ئاوارە بزڤرنە سەر جهوارێن خوە.
هاولاتیێن خوە یێن ئێزدی پشتراست دکەین کو هەتا ئێک رەڤاندی ژی مابیت، تیما نڤیسینگەها مە دێ یا بەردەوام بیت د کارێن خوەدا بۆ رزگارکرن و ئاشکراکرنا چارەنڤیسێ وان.
هەروەسا دێ بەردەوام بین ل سەر بزاڤێن خوە یێن نێڤدەولەتی دا تاوانێن داعشێ ل سەر ئاستێ جیهانێ ب تەمامی وەک جینۆساید بهێنە ناساندن.
د ڤێ بیرەوەریێدا، سوپاس و پێزانینێن خوە یێن کویر ئاراستەی خەلکێ مێڤانپەروەرێ دهۆکێ و بەهدینان ب گشتی دکەین کو د دەمێن سەختدا دەرگەهێن مال، قوتابخانە و مزگەفتێن خوە بۆ ئاوارەیێن ئێزدی ڤەکرن.
سوپاس و پێزانین بۆ هەمی وان وەلاتێن ئەڤ تاوانە وەک جینۆساید ناساندی و ب هەر رەنگەکی بیت هاریکارییا ئێزدییان کری.
سڵاڤ ل خوەراگریا جڤاکا ئێزدی، دروود بۆ گیانێ پاقژێ شەهیدان و هەمی وان پێشمەرگەیێن قارەمانێن وێ رۆژگارا سەخت ب فەرماندەییا جەنابێ سەرۆک مەسعود بارزانی، ئەفسانەیا داعشێ تێکشکاندی و گیانێ خوە بۆ ئازادکرنا شنگالێ و پاراستنا شکۆیا نیشتمانی بەخشی.