ناڤهندا نووچهیان – سهما
بنگههێ لالش ل دهۆكێ ل بیرهوهرییا (12)ێ یا جينۆسايدا ئێزدییان پهیامهك بهلاڤكر و ڕاگههاند، ئازارێن ئێزدییان ب داوی نههاتینه، چنكو دادپەروەرى هێشتا ب تەمامى ب جھ نەهاتییە، و قەرەبووکرنا زیانڤێكهڤتییان هێش د ئاستێ مەزناهییا جینۆسایدێ دا نینە، و ئاڤەدانکرنا دەڤەرێن وێرانكری و پێگههاندنا جڤاكێ ئێزدی پێدڤى ب پێكۆلێن مەزنتر و بەرپرسیارییەکا هەڤپشك هەیە.
دهقێ پهیاما بنگههێ لالش:
ل بیرهوهرییا (12)ێ یا جينۆسايدا ب سهرێ ئێزدییان دا هاتی ل 3ی تهباخا 2014ێ دا، بنگههێ لالش يێ ڕهوشهنبیری و كۆمهلایهتی ب خهمهكا كوور ڤە وان ڕۆژێن ڕهش و نهخۆش ل بیر دئینین، كو ئێك ژ درندهترین تاوانێن ل دژى مرۆڤاتییێ بوو د سەردەمێ ههڤچهرخ دا، دەمێ ڕێکخراوا تیرۆرستی یا داعش ب سەر دەڤەرێن ئێزدییان دا گرتی تاوانێن كوشتنا بكۆم، ڕەڤاندن، ئێخسیرکرن، زۆرییا دهرێخستنێ ژ جهـ و وارێ وان، و تێکدانا گوند، مەزارگەهـ و هێمایێن ئۆلى و کەلتوورى دهرههقێ ئهواندا ئهنجامدان، ئهڤهژی بزاڤەکا دیار بوو بۆ ژناڤبرنا ڕههـ و ریشال و ناسنامەیا ئێزدییان یا دیرۆكی.
تاوانێن داعش نهبتنێ ئارمانجگرتنا مروڤێ ئێزدی بوو، بەلكو ئارمانجگرتنا ناسنامە، ڕهوشهنبیری و کەلتوورێ وان ب درێژاهییا ب ههزارێن سالان بوو، و ژ ڕۆژا كۆمكووژیێ ههتا نهۆ، هێش شوونوارێن جينۆسايدێ د ژیانا ئێزدیان دا دیارن؛ ب هەزاران ڕزگاربوویی هێش برینێن وان یێن كوور و دهروونی ساخ نهبووینه، و هێش چارهنڤیسێ گەلەک ژ ڕەڤاندییان نەیێ دیارە، د هەمان دەم دا ئێش و ئازارێن ئاواران د بەردەوامن ژبهركو بهردهوام چاڤەڕێ ڤەگەڕیانێ دكهن بۆ سهر جهـ وارێ خۆ ل شنگالێ سهرهرای نهبوونا ئارامییێ، خزمەتگۆزارییێن سەرەکى و گەرەنتیكرنا دووبارهنهبوونا جینۆسایدان.
بۆرینا دوازدە سالان ب سەر جينۆسايدێ دا، ڕامانا وێ ئەو نینە کو ئازارێن ئێزدییان ب داوی نههاتینه، چنكو دادپەروەرى هێشتا ب تەمامى ب جھ نەهاتییە، و قەرەبووکرنا زیانڤێكهڤتییان هێش د ئاستێ مەزناهییا جینۆسایدێ دا نینە، و ئاڤەدانکرنا دەڤەرێن وێرانكری و پێگههاندنا جڤاكێ ئێزدی پێدڤى ب پێكۆلێن مەزنتر و بەرپرسیارییەکا هەڤپشك هەیە ئهوژی ژ ئالییێ حكومەتا عێراقێ، جڤاکێ نێڤدەولەتى و سازییێن گرێدایی ب مافێ مرۆڤى ڤە.
ئهم د پهیاما خۆ یا ڕهوشهنبیری و كۆمهلایهتی دا ڕژدیێ ل سهر پاراستنا ناسنامەیا ئێزدییان یا ئۆلی و کەلتووری دكهین، ئهم تەکەزیێ ل سهر ڤان خالێن ل خوارێ دکەین:
-بەردەوامبوونا لێگەڕیانێ ل دووڤ ڕەڤاندییێن ئێزدی و ئاشكراكرنا چارهنڤیسێ وان، و پێشکێشکرنا پشتهڤانییا تەمام بۆ ڕزگاربووییان و چارەسەرکرنا دۆسیەیا گۆڕێن بکۆم.
-بدهستڤهئینانا دادپەروەرییێ و سزادانا تاوانبارێن تاوان ل دژى ئێزدییان ئهنجامداین ل دووڤ یاسایێن نیشتیمانی و نێڤدەولەتى و تاوانبار بگههنه سزایێ خۆ.
– لەزکرن د بجهئینانا بەرنامەیێن قەرەبووکرنا زیانڤێكهڤتی و قوربانییان، ب ئاوایەکى کو مافێن وان یێن مادى و مەعنەوى یێ پاراستی بت.
-پشتهڤانییا ئاڤەدانکرنەڤەیا دەڤەرێن ئێزدییان، دابینكرنا ژینگهههكا گونجایى بۆ ڤەگەڕیانهكا ئارام و ئارهزوومهندانه بۆ ئاوارهیان، و چهسپاندن و گهرەنتیكرنا ئاشتی و ئارامییێ بۆ دهڤهرێن وان.
-پاراستنا کەلەپوور و کەلتوورێ ئۆلا ئێزدییان كو تووشی ژناڤچۆنێ ببوو كو پشكهكا ڕهسهن یا پر ڕهنگییا شارستانیهت و مرۆڤاتییێ یه ل دهڤهرێ.
د ڤێ بیرهوهرییا دلتەزین دا، ئهم پەیاما خوۆ نوو دکەینهڤه بۆ بهرهڤانیكرنا مافێن ئێزدییان، و ڤەگوهاستنا ڕاستییا ب سهرێ واندا هاتی بۆ نڤشێن بێت و هەموو جیهانێ، د دیتنا مهدا ب تنێ دادپەروەری دكارت برینان ساخ بکەت، و دانپێدان ب كۆمكووژیێ پێنگاڤا ئێکێ یه بهرهف پاشەرۆژهكا گهش ل سەر بنەمایێ ئاشتی و سەربلندی و یەکسانییێ.
جهێ جانگۆرییان بههشت بت، ئازادی بۆ ڕەڤاندییان و دادپەروەری بۆ قوربانییان.
بنگههێ لالش یێ ڕهوشهنبیری و كۆمهلایهتی/دهۆك
1ـی تەباخا 2026