ناڤهندا نووچهیان – سهما
لقێ ئێك يێ PDK ل دهۆكێ، د 12هەمین سالیادا جینۆسایدا ئێزدییان دا دوپاتكر، ئەڤ جينۆسايدا مەزن نە تەنها دەستدرێژییەک بوو سەر پێکهاتەکا ڕەسەن و ئارام، بەلکو هێرشەکا ب بەرنامە و پلان بوو بۆ ژناڤبرنا ناسنامە، کەلتوور و قەوارەیا مێژوویی یا ڤی ملەتی.
د پەیامێ دا هاتييه:
ئەڤرۆ، ل یادا بریندار و خویناوییا جینۆسایدا خوشک و برایێن مە یێن ئێزدی، کو ب دەستێ رێکخراوا تیرۆریستیا داعش، تاریترین هێزا دژە مرۆڤایەتیێ، هاتیە ئەنجامدان، سەرێ رێزێ بۆ گیانێ پاکێ هەمی قوربانیان دادەنین و نەفرەتا خۆ ل دژی وان تاریپەرستان رادگەهینین.
ئەڤ کارەساتا مەزن نە تەنها دەستدرێژییەک بوو سەر پێکهاتەکا ڕەسەن و ئارام، بەڵکو هێرشەکا ب بەرنامە و پلان بوو بۆ ژناڤبرنا ناسنامە، کەلتور و قەوارەیا مێژوویی یا ڤی مللەتی؛ ئەو مللەتەی کو سەدان ساڵانە بەشێکی ڕەسەن و بنەڕەتی یێ پێکڤەژیان و فرەیی ل دەڤەرێ بوویە. تیرۆریستان ب هۆڤانەتییا خۆ هەوڵدان ئارمانجێن تاری یێن خۆ جێبەجێ بکەن، بەڵام بەرخودانا خەلکێ مە و خۆڕاگرییا پێشمەرگەیێن قارەمان، ب ڕێبەراتیا سەرۆک بارزانی، پیلانێن وان تێک شکاندن و ئاراستەیا مێژوویی گۆڕی.
ژ دەستپێکا ئەڤ کارەساتی هەتا ئەڤرۆ، پارتی دیموکراتی کوردستان ب ئەرک و بەرپرسیارەتییا خۆ یا مێژوویی و ئەخلاقی رابووە، و ب هەمی هەوڵ و بزاڤێن دیپلۆماسی و سیاسی، داکۆکی ل وێ یەکێ کریە کو ئەڤ کۆمکوژییە ل سەر ئاستێ جیهانێ وەکو جینۆساید بهێتە نیاسین، و هەروەها داکۆکی ل ماف، کەرامەت و قەدەرا خوشک و برایێن مە یێن ئێزدی دکەت.
ئەم دووبارە دکەین کو برینا ئێزدیان برینا هەمی کوردستانییانە، و ئاشتی و پێکڤەژیانا ڕاستەقینە ل دەڤەرێ تەمام نابیت، هەتا دادپەروەری بۆ قوربانیان نەهێتە دابینکرن، چارەنڤیسێ ڕەڤاندیان نەهێتە ئاشکراکرن، و شنگال و هەمی دەڤەرێن وێ نەهێنە ئاڤەدانکرن و مەرجێن ڤەگەڕانا خەڵکی بۆ سەر زێد و لانکەیێن خۆ یێن ڕەسەن نەهێنە دابینکرن.
نەمری بۆ گیانێ پاکێ شەهیدێن جینۆسایدێ، و سەربلندی بۆ ملەتێ مە.