ناڤەندا نووچەیان – سەما
وەزارەتا ئەوقاف و کاروبارێن ئاینی یا حکومەتا هەرێما ل کوردستانێ، دوپاتێ ل سەر ب هێزکرنا گیانێ تەبایی و پێکڤەژیانێ ل هەرێما کوردستانێ دکەت و د دەربارەی بەلاڤبوونا گرتەکا ڤیدیۆیی کو تێدا بێڕێزی ب پێکهاتەیا ئێزدی دئێتە کرن، ڕادگەهینت؛ بکارئینانا هەر پەیڤەکا نە لۆژیکی بەرانبەر هەر پێکهاتەیەکی ب توندی ڕەت دکەین.
ئیرۆ دوشەمبێ، 10ی تەباخا 2026، پەیڤدارێ وەزارەتا ئەوقافێ و کارووبارێن ئایینی د ڕۆونکرنەیەکێ دا ئاماژێ ب هندێ ددەت، فەرهەنگا پێکڤەژیانێ ل هەرێما کوردستانێ ڕەگ و بنەچەیەکێ مێژوویی یێ قوول هەیە، مامۆستایێن بەڕێز یێن ئاینێ پیرۆزێ ئیسلامێ و هەموو ئاینێن دی، بەردەوام ڕۆلەکێ کاریگەر هەبوویە و پێکڤە هاریکار بووینە بۆ پێشئێخستنا گیانێ تەبایی و ئاشتییا کۆمەلایەتی.
دەربارەی بەلاڤبوونا گرتەکا ڤیدیۆیی کو تێدا بێڕێزی ب پێکهاتەیێ ڕەسەن یێ ئێزدیان دئێتە کرن، د ڕاگەهاندنێ دا هاتبوو ڕۆنکرن کو ئەو ڕوودان ل دەرڤەی سنوورێ هەرێما کوردستانێ و عێراقێ بوویە، بەلێ دوپاتکر “ئەڤ کریارە ب تەمامی دوورە ژ بەهایێن ئایینی و مرۆڤاتییێ.”
هەروەسا دوپاتکریە، بکارئینانا هەر پەیڤ و دەربڕینەکا نە لۆژیکی بەرانبەر هەر پێکهاتەیەکی ب توندی ڕەت دکەین، ئاماژە ب هندێ ژی کریە کو تەکەزی ل سەر بەردەوامییا برایەتی، حەز ژێکرن و پێکڤەژیانا هەمەلایەنە د ناڤبەرا هەموو ئاین و پێکهاتەیان دا دئێتە کرن.