ناڤهندا نووچهيان ـ سهما.
پشتی بەلاڤبوونا گرتەیەکا ڤیدیۆیی یا مامۆستایەکێ ئایینی یێ خەلکێ ڕۆژهەلاتێ کوردستانێ کو تێدا گەفێن ژناڤبرنا ئێزدييان دکەت، ڕێڤەبەرێ گشتی یێ کاروبارێن ئێزدییان ل وەزارەتا ئۆقاف و کاروبارێن ئایینی یا هەرێما کوردستانێ داخوازا دەرئێخستنا یاسایەکا تایبەت بۆ ڕووبڕووبوونا گۆتارێن کەربوکینێ کر. سعود مستۆ، ڕێڤەبەرێ گشتی یێ کاروبارێن ئێزدییان ڕاگەهاند: ” ئێزدی ل ئێران و ڕۆژهەلاتێ کوردستانێ ناژین ئەم هەست دکەین دەستەکێ دەرەکی ل پشت وی کەسی یە بۆ تێکدانا ئاشتییا جڤاکی ل هەرێما کوردستانێ.”
سعود مستۆ گۆت: “مە داخواز کرييه یاسایەکا تایبەت بۆ ڕووبڕووبوونا گۆتارێن کەربوکینێ بێتە دەرئێخستن، بەتایبەتی ل سۆشیال میدیایێ، چونکی جەستەیێ جڤاکا ئێزدی بریندارە و بەرگەیا ڤان هەموو ئاخفتنێن پر ژ کەربوکینێ ناگرت.”بەری نوکە ژی ب هەماههنگییا بنگەهێ لالش و وەزارەتا ئۆقافێ، نەخشەڕێیەک بۆ رووبرووبوونا ئاخفتنێن دژاتی و کەربوکینێ هاتبوو ئامادە کرن.ل گۆڕەيی ڕێڤەبەرێ گشتی یێ کاروبارێن ئێزدییان، وەزیرێ ئهوقافێ و ئێکەتییا زانایان د گەل جڤاکا ئێزدی د پەیوەندیيێ دا نە و جەختێ ل سەر پاراستنا پێکڤەژیانێ دکەن. ئاماژە ب وێ یەکێ ژی کر کو ئەڤ بابەتە بۆ وهرگرتنا رێکارێن پێدڤی گەهانديیە فەرمانگەها پەیوەندیێن دەرڤە، بەشێ ئێرانێ. سعود مستۆ گۆت: “ئەڤ جۆرە ئاخفتنە تەنێ دژی ئێزدییان نینن، بەلکو ل هەمان دەم دا زێدەگاڤی یە ل سەر منبەرێ و پەیاما ڕاستەقینا ئیسلامێ و زیانێ ب بەهايێن پیرۆز دگەهینت.”