ناڤەندا نووچەیان – سەما
دادگەها تێهەلچوونەوا نەینەوا، سەر ب جڤاتا بلند يا دادوەرى ل عێراقێ، فهرمانەکا فەرمی ڕابهرى تەڤايا دادگەهـ و دەستهەلاتێن دادوەری یێن سەر ب ڤێ سەرۆکاتیيێ ڤە کر، ب مەبەستا ڕەخساندنا زۆرترین ئاسانکاری و بەرچاڤوەرگرتنا تایبەتمەندیيا ڕزگاربوویێن ئێزدی ل دەمێ تۆرماركرن و وەرگرتنا گۆتنێن وان.
ل رۆژا 15ـى ئەیلوولا 2026، ڕائید حەمید موسلح، سەرۆکێ دادگەها تێهەلچوونەوا نەینەوا ب ئیمزایا خۆ ئەڤ فهرمانە دەرئێخستیيە، و ئێرۆ پێنجشەمبێ هاتە بەلاڤکرن. د ناڤەڕۆکا فەرمانێ دا هاتیيە، ئەڤ بڕیارە بۆ بەرژەوەندیيا گشتی و ب پشتبەستن ب یاسایا ڕزگاربوویێن ئێزدی ژمارە 8 یا سالا 2021 یە، هەروەسا بۆ جێبەجێکرنا گەرەنتیيێن د ناڤ یاسایێ دا کو پێدڤیيە دادگەهـ ل دەمێ وەرگرتنا گۆتنێن ڕزگاربوویان، بارودۆخ و تایبەتمەندیيا وان کەسان بەرچاڤ وەربگرن.
فەرمان دوپاتێ ل سەر چەند خالێن گرنگ دکەت:
– تایبەتمەندی و ئازادی د دەربڕینێ دا: پێدڤیيە ل دەمێ وەرگرتنا گۆتنێن ڕزگاربوویان، تەڤایا بياڤ و تایبەتمەندیيان بدەنە وان و ب تنێ و بێی ئامادەبوونا کەسێن دی گۆتنێن وان بێنە تۆمارکرن.
بەرچاڤوەرگرتنا بارێ دەروونی: ژ بەر کو د قۆناغێن بۆری دا، ژ بهر سەختیا بارێ دەروونی و کۆمەلایەتی، ژمارەکا ڕزگاربوویان نكارينه ناڤێ وان کەسان بێژن ئەوێن تاوان بەرامبەر ئەنجام داین. نهۆ پێدڤیيە دەرفەتەکا دی بۆ وان بێتە ڕەخساندن و هاریکاریيا وان بێتە کرن بۆ ئاسانکاریکرنێ د ڕێکارێن دادوەری دا و بجهئینانا دادپەروەریيێ بۆ وان.