ناڤەندا نووچەیان – سەما
راپۆرتەکا دەرکەڤتی ژ ئالييێ بەرنامەیێ نەتەوەیێن ئێکگرتی بۆ گەشەپێدانێ (UNDP) قهبارهيێ وێرانکاریا مەزن يا ب ژێرخانە، دامودەزگەهێن حکومی و ملکێن ئاکنجیبوونێ ل قەزا شنگالێ كهڤتى ديار دكهت، کو تێکڕایێ تێچوویێن پێدڤی بۆ پرۆسەیێن ئاڤەدانکرنێ ب نێزیکی 875 ملیار و 827 ملیۆن دیناران هاتیيە خەملاندن.
ل دووڤ راپۆرتا (UNDP)، ئاڤاهیێن دادگەهێ، تۆمارکرنا خانوبەران، شوونوار و پۆلیسان ل شنگالێ ب ڕێژەیا 100% وێران بووینە، د هەمان دەم دا نڤيسينگەها دادنڤيسێ و بەنکا چاندنێ ب ڕێژەیا 80%، و فەرمانگەها ئامارێ ب ڕێژەیا 75%، و ئاڤاهیيێ چاڤدێرييا سێوييان ب ڕێژەیا 70% زیان پێ کەڤتینە.
هەلسەنگاندنێ تێچوویێن ئاڤەدانکرنێ ل سەر دەڤەرێن ئیداری یێن سەر ب قەزا شنگالێ ڤە دابەش کرینە، کو ب گشتی پێدڤی ب 875 ملیار و 827 ملیۆن دینارانە:
سەنتەرێ قەزا شنگالێ: پێدڤی ب زێدەتر ژ 77.2 ملیار دینارانە، کو ب ڤی ئاوایی دابەش دبن: 1.5 ملیار دینار بۆ بهێزکرنا شیانێن فەرمانبەرێن حکومی ل ئاستێ دەستپاکی، شەفافیەت، پرسیارکرن، و سیستەمێ سکالایان. 71.2 ملیار دینار بۆ نووژەنکرن و ئاڤاکرنا ئاڤاهیێن باژێرڤانى و ژێرخانەیێ، و 4.5 ملیار دینار بۆ باشترکرنا خزمەتگۆزاريیێن بارێ شارستانی (کارتا نیشتمانی).
ناحیهيا سنوونێ: پێدڤی ب 56 ملیار دینارانە بۆ بجهئینانا هەمان پرۆژەیان.
ناحیهيا گرعزێر: پێدڤی ب 6.9 ملیار دینارانە.
ناحیهيا قەیرەوان: پێدڤی ب 36 ملیار دینارانە بۆ دابینکرنا خزمەتگۆزاريیێن هەڤشێوە.
دەڤەرێن دى یێن شنگالێ: پێدڤی ب 1.5 ملیار دینارانە.
زیان ب 36 ههزار خانييان كهڤتينه.
ههر ل دووڤ ڕاپۆرتێ ، 36,140 خانى ژ ژبهر شەڕێ داعشێ زیان پێ کەڤتینە، کو هندەک ژ وان ب تەمامی وێرابووینە و هندەکێن دی ژی ب شێوەیەکى پشکی زیان دیتینە.
ناحیهيا سنونێ زێدەترین زیان پێ کەڤتیيە، کو 9,944 خانى تێدا زیاندار بووینە (4,175 خانى ب تەمامی وێران بووینە، و 5,769 خانى ب پشکی زیان پێ کەڤتیيە)، د دەمەکى دا کێمترین ژمارەیا خانييێن زیاندار ل ناحیهيا قەیرەوان هاتیيە تۆمارکرن کو 7,703 خانى بووینە.
تێچوویێ نووژەنکرن و ئاڤاکرنا خانييێن زیاندار ل قەزا شنگالێ ب 810 ملیار و 110 ملیۆن دیناران هاتيیە خەملاندن.
کەرتێ ساخلەمیيێ: شنگال ل ڤی کەرتیدا پێدڤی ب 54.9 ملیار دینارانە د ماوهيێ شەش سالان دا، ئهڤ دراڤه دێ بۆ ئاڤاکرنا نەخۆشخانە و سەنتەرێن ساخلەمیيێ و دابینکرنا پێدڤیيێن پزیشکی ئێتە تەرخان کرن.
کەرتێ پەروەردێ: نێزیکی 32.5 ملیار دیناران بۆ ئاڤاکرن و نووژەنکرنا قوتابخانەیان هاتیيە تەرخانکرن.
کەرتێ ئاڤێ و ئاڤڕيژا: قەزا پێدڤی ب 18.3 ملیار دینارانە.
کەرتێ ڕێک و پران: تێچوویێ خەملاندی بۆ چاککرن، قیرکرن، و ئاڤاکرنا ڕێيان ل قەزا شنگالێ گەهشتە 50.7 ملیار دیناران.
کەرتێ چاندنێ: قەزا پێدڤی ب 31 ملیار دینارانە بۆ پشتگیریکرنا پرۆژەیێن چاندنێ و سامانێ ئاژەلی.
کەرتێ کارەبێ: پێدڤی ب 71.5 ملیار دینارانە بۆ ڕاکێشانا کێبلان، دانانا ستوونێن کارەبێ و محاویلان، و دابینکرنا پێدڤیێن دی یێن تەکنیکی.