ناڤه‌ندا نووچه‌يان – سەما
رۆژا چارشەمبێ، 14ـى چريا ئێكێ 2026، ل پیرمام، سەرۆك مەسعود بارزانی پێشوازی ل خانما گوێندەلن (ویندی) گرین، كونسوڵا گشتی یا نوو یا ئەمەریکا ل هەولێرێ کر.
د دیدارێ دا، كونسوڵا گشتی یا ئەمەریکا ل هەولێر دلخۆشیا خۆ دیار کر کو وەک كونسوڵا وەڵاتێ خۆ ل هەرێما كوردستانێ دەست ب كار بوویە، و ئەوە ژی دیار کر کو ئەو د هەولێن خۆ بۆ پێشخستنا پەیوەندیێن ناڤبەرا هەرێما كوردستانێ و ئەمەریکایێ دا بەردەوام بیت، و ئاماژە ژی دا کو وەڵاتێ وێ خۆ ب پشتەڤانەکێ سەرەکی یێ خەلکێ كوردستانێ دزانیت، و رێزەکا تایبەت بۆ پێگەهێ سەرۆك بارزانی ل عێراقێ و دەڤەرێ هەەیە، و هیڤی ژی خواست کو هەرێما كوردستانێ وەک هەردەم ل رۆلێ خۆ یێ بهێزکرنا سەقامگیریێ ل دەڤەرێ بەردەوام بیت.
هەروەسا سەرۆك بارزانی ب گەرمی بێخێرهاتنا كونسوڵا ئەمەریکا ل هەولێر کر و سوپاسیا ئەمەریکایێ کر کو د شەڕێ تیرۆرستێن داعشێ دا پشتەڤان و هاریکارێ هەرێما كوردستانێ بوویە. سەرۆك بارزانی دەستپێکرنا کارێن كونسوڵخانا ئەمەریکا ل هەرێما كوردستانێ ب هەنگاڤەکە ئەرێنی ل قەلەم دا، دا کو پەیوەندیێن ناڤبەرا هەردو لاینان ل بیاڤێن جودا جودا پتر پێشکەفتنێ بوینن.
هەروەسا د وێ دیدارێ دا بیروبۆچوون ل بارا بارودۆخێ دەڤەرێ هاتنە گوهۆڕین و هەردو لاینان جەخت ل سەر وێ چەندێ کر کو دڤێت ئاشتی و سەقامگیری ل دەڤەرێ هەبیت.