ناڤەندا نووچەیان – سەما
ئیرۆ شەمبی، 17ی چریا ئێکێ 2026، بنگەهێ لالش ل دهۆکێ د پەیامەکێ دا ب توندی داخواز ل حکومەتا عێراقێ کر قەرەبوویا ئێزدییان بکەن و بێبەهرنەبن ژ پۆستان د کابینەیا حکومەتێ دا.
دەقێ پەیاما بنگەهێ لالش:
ئەم وەکو ئێزدی، و وەک پێکهاتەیەکێ ئۆلی یێ ئاشتیخواز، هەردەم وەسا دبینین کو هشیارکرنا وەلاتان د هەلبژارتنا حکومەتێن نیشتمانی یێن شارەزا و دەستپاقژ دا دیار دبت، کو هەموو خەمێن وان خزمەتکرنا ملەتی و بهێزکرنا سەروەریا وەلاتی بت ب تەرکیزکرنێ ل سەر پرۆژەیێن گەشەپێدانێ و ئاڤەدانکرنێ، و نەهەدەردانا سەروەت و سامانێن وەلاتی د بوارێن بێ مفادا.
پشتی کەڤتنا رژێما بەرێ یا عێراقێ ل سالا 2003ێ، عێراقێ بنەمایەکێ نوو د بازاڕێ بەرهەمئینانا پرۆسەیا سیاسی دا دیت، کو “محاصصة” (پشکپشکێنە) بوو بنەما بۆ ئاڤاکرنا هەر حکومەتەکێ یان بەخشینا هەر پۆستەکی، و مخابن بنەمایێن هەرە گرنگ و خودان بهایێن بلند وەک شارەزایی، دەستپاقژی و ئەزموون، و تەنانەت باوەرنامە ژی وندا بوون.
سەرەرای کو ئەم وەک جڤاکەکێ ئێزدی، هەزاران کەسێن خودان باوەرنامەیێن بلند ل جەم مە هەنە، و خودان شارەزایین کو ئەم پێ سەربلندین، بەلێ “محاصصة” ئەو سەکۆ بوو ئەوا هەموو هیڤیێن گەنج و زەلامێن مە یێن شارەزا و دەستپاقژ تێدا هاتینە سێدارەدان، تەنانەت ئەو پۆستێن کێم ژی ئەوێن گەهشتینە کەساتییێن ئێزدی چ جاران نە ل گۆڕەیی ژمارەیا ئاکنجییێن مە و نە ل گۆڕەیی دەنگدانا مە یا هەلبژارتنان بوون د مەیدانێن هەلبژارتنان دا. ب راستگۆیی دبێژین کو ئەم وەک ئێزدی ژی بەرپرسیارەتییا پشکەکا مەزن یا وێ چەندێ هەلدگرین ئەوا ب سەرێ مە هاتی ژ بەر لێکڤەبوونا مە یا سیاسی و تەنانەت یا جڤاکی ژی.
سەیر نینە کو ستەم و بێبەهرکرن د بەخشینا پۆستان دا بەر کەڤیتە مە د گەل هەر پێکهاتنەکا حکومەتێ دا، بەلێ تشتێ سەیر و جهێ سەرەنجێ ئەوە ئەگەر دادپەروەری ب مە بێتە کرن.
شەمەندەفەرا حکومەتا رێزدار عەلی زەیدی نەگەهشتییە وێستگەها خۆ یا داوییێ، لەورا ئەم ب توندی داخواز دکەین کو قەرەبوویا ئێزدیان بێتە کرن ب ڕێیا بەخشینا پۆستان ب پلەیا وەکیلێ وەزیری و ڕێڤەبەرێن گشتی، و رێڤەبەرێن قەزا و ناحیان، ب مەرجەکی کو ژ کەسێن شارەزا و دەستپاقژ بن. هەروەسا داخوازێ دکەین ب گرنگیدانەکا تایبەت بۆ ئێکلاکرنا دۆسیەیا قەرەبووکرنا خەلکێ شنگالێ و دەڤەرێن دی یێن ئێزدی ئەوێن خەلکێ وان کۆچبەر بووین، و دووبارەکرن و زێدەکرنا گرنگیدانێ ب کۆچبەرێن کو ژ سالا2014ێ و هەتا نهۆ د بن خیڤەتان دا ژیانا خۆ دەرباز دکەن.
دەستەیا بلندا بنگەهێ لالش یێ رەوشەنبیری و کۆمەلایەتی/ دهۆک
17ی چریا ئێکێ 2026