ناڤه‌ندا نووچه‌يان – سه‌ما
دماوێ كێمتر ژ 72 ده‌مژمێران دا، دوو ڕوودانێن ئاگربه‌ربوونێ ل كه‌مپێن قاديا و ده‌ركارێ يێن ئاواره‌يێن شنگالێ ل سنوورێ ئيدارا سه‌ربه‌خۆيا زاخۆ ڕوودان.
ل كه‌مپا قاديا يا ئاواره‌يێن شنگالێ، ئاگره‌كێ مه‌زن به‌ربوو نێزيكى 10 كه‌ره‌ڤانان و بوو ئه‌گه‌رێ ده‌ربه‌ده‌ربوونا هه‌ژماره‌كا خێزانان.
پاشان ب چه‌ند ده‌مژمێران، ئاگره‌كێ دى ل كه‌مپا ده‌ركارێ په‌يدابوو، كو بوو ئه‌گه‌رێ سۆتنا سێ كه‌ره‌ڤانان.
خۆشبه‌ختانه دڤان هه‌ردوو ڕوودانان دا چ زيانێن گيانى نه‌بوون و ب تنێ زيانێن مادى بوون.
دڤى ده‌رباره‌ى دا، د.ڤيان ده‌خيل، ئه‌نداما په‌رله‌مانێ عيراقێ ڕاگه‌هاند، ئه‌ڤ ڕوودانێن دووباره چێدبن بوويه ئاماژه‌يه‌كا مه‌ترسيدار ل سه‌ر پشتگوهـ خستنا كه‌يسا ئاواره‌يان، دچارچووڤێ نه‌بوونا كێمترين مه‌رجێن سلامه‌تيێ و مرۆڤى ل ناڤا كه‌مپاندا.
گۆتژى: حكومه‌تا عيراقێ و وه‌زاره‌تا كۆچ و كۆچبه‌رێن عيراقێ به‌رپرسياريا ته‌مام دبينين، پێدڤيه لڤينه‌كا رژد بكه‌ن بۆ ديتنا چاره‌سه‌رييه‌كا ڕيشه‌يى كو ئازارێن ئاواره‌يێن يێن به‌رده‌وام ژ ده‌ما چه‌ندين سالان ب دواى بينت.
ئاماژه ب وێ چه‌ندێ دا، د هه‌مان ده‌مدا ڕۆلێ به‌رگريا شارستانى كو بله‌ز گه‌هشته جهێ هه‌ردوو بوويه‌ران و كارين ئاگرى كۆنترۆل بكه‌ن به‌رى به‌رفره‌هـ ببت و كاره‌ساته‌كا مرۆڤى يا مه‌زن چێبت.
د.ڤيان ده‌خيل، باس ل وێ چه‌ندێ ژى كر، خه‌ڵكێ مه ل كه‌مپان هه‌ژى ژيانه‌كا ئارام و شايسته‌نه، نه‌كو ل كه‌ره‌ڤانان دا بمينن، هه‌تا كو بێنه سۆتن.