ناڤه‌ندا نووچه‌يان – سەما
کۆمەلگەها شاریا یا سەر ب قەزا سێمێلێ ڤە ل پارێزگه‌ها دەهۆکێ پێشکەڤتنەکە بەرچاڤ یا پرۆژەیان ب خۆ ڤە دیتییە، د نۆکە دا هەژمارەکا پرۆژەیێن خزمەتگۆزارى د قۆناغا بجهئینانێ دانە کو مەرەم ژ وان باشترکرنا ئاستێ ژیانا وەلاتییان و ڕێکخستنا سیمایێ ده‌ڤه‌رێ يه.
شەمبی، 17ـى چريا ئێكێ 2026، ئیسماعيل سلێمان، سەرۆکێ باژێرڤانییا شاریا بۆ سەما ڕاگەهاند، کاروانێ ئاڤەدانییێ ل کۆمەلگەها شاریا بەردەوامە و بۆ بتر خزمەتکرنا وەلاتییان و زێدەکرنا ڕووبەرێ کەسکاتییێ، نهۆ دەست ب دروستکرنا باخچەکێ دی یێ گشتی ل سەر رووبەرێ 2 هه‌زار و 500 مەترێن چوارگۆشە هاتییە کرن، کو چەندین جۆرێن دار و گۆلان دێ لێ ئێنە چاندن دا کو ببتە جهەکێ بێهنڤه‌دانێ بۆ خەلکێ دەڤەرێ.
سەرۆکێ باژێرڤانییا شاریا ئاشکراکر: پرۆژەکێ دی یێ گرنگ د قۆناغا بجهئينانێ دايه كو دورستكرنا 20 نافۆرێن ئاڤێ یە دگەل جوانکرن و رۆنکرنا جادەیه‌كا کۆمەلگەهێ، کو دێ سيمايێ کۆمەلگەهێ ب شێوازەکێ هه‌ڤچەرخ به‌رچاڤ كه‌ت.
هەروەسا خویاکر، د بەرنامە دایە سۆلینەکا ئاڤڕێژ ب درێژاهییا 800 مەتران بێتە چێکرن دا کو ڕێگری ل کۆمبوون و دروستبوونا ئاڤا بارانێ بێتە کرن. زێدەباری ڤێ ژی، کار ل سەر سەخبێریکرن، قیرکرن و چێکرنا جادەیێن ناڤخۆیی یێن گوندان ب بەردەوامی دئێتە کرن.
ل سەر دەمێ کابینەیا نەهێ یا حکومەتا هەرێما کوردستانێ و تا نهۆ، چەندین پرۆژە د بیاڤێن جودا ل کۆمەلگەها شاریا هاتینە ئەنجامدان، بۆ هندێ بتر خزمەتا وەلاتیيان و باشكرنا ژيانا وان بێته كرن.