ناڤه‌ندا نووچه‌يان – سه‌ما
رێکخەرێ راسپاردەیێن نێڤدەولەتی ل حکومەتا هەرێما کوردستانێ ڕاگه‌هاند، تاوانێن داعشێ ژ ئالييێ حكومه‌تا عێراقێ ڤه هاتينه ناساندن و ب مخابنى ڤه ل سه‌ر ئاستێ ناڤده‌وله‌تى نه‌هاتينه ناساندن.
د. دیندار زێباری، رێکخەرێ راسپاردەیێن نێڤدەولەتی ل حکومەتا هەرێما کوردستانێ ئیرۆ ئێكشه‌مبێ، 18ـى تشرینا ئێكێ 2026، د کۆنفرانسه‌كێ رۆژنامەڤانی دا گۆت: ” ل سالا 2014ێ، دەمێ دەڤەرێن کوردستانێ یێن دەرڤەی ئیدارا هەرێمێ کەڤتینە دەستێ تیرۆرستێن داعشێ دا، وێ ڕێکخراوێ چەندين تاوانێن مرۆڤی و شەڕی ئەنجامدان، وەکی کوشتنا بکۆم، کریارێن تیرۆرستی و جینۆساید، دگەل ئاوارەکرنا هەزاران خێزانان و بازرگانیکرنا ب مرۆڤ و ماده‌يێن هۆشبەران ڤە.”
ده‌رباره‌يى ده‌ڤه‌را شنگالێ، زێباری ڕاگەهاند، ڕێککەڤتنەک ب سەرپەرشتیيا نەتەوەیێن ئێکگرتی د ناڤبەرا حکومەتا هەرێمێ و حکومەتا فیدڕال دا هاتیيە ئيمزاکرن بۆ هندێ دەڤەر ببته دەڤەرەکا یاسایی یا کو ل ژێر کۆنترۆلا دەزگەهێن دەولەتێ دا بت. ڕاستی ئاماژەیيه بۆ کۆنترۆلا هێزەکا چەکدار یا نەناس کری کو کاروبارێن دەڤەرێ ڕێڤە دبەت و بڕیار ژ لایێ لایەنەکێ نەدیار ڤە دەردکەڤن.
زێباری گۆتژی، دەڤەر بێ گوهۆڕين مایە، نەهاتیيە ئاڤەدانکرن و نە ژی ئاوارە بۆ مالێن خۆ ڤەگەڕیاینە.
ڕێکخەرێ راسپاردەیێن نێڤدەولەتی دوپاتكر، هەرێما کوردستانێ ئێک بوو ژ لایەنێن دیار یێن کو د ڕووبڕووبوونا تیرۆریستێن داعشێ دا قوربانی داینە و هێزێن پێشمەرگەیى ب وێره‌كيانه بەره‌ڤانى ژێ کریيە.