ناڤه‌ندا نووچه‌يان – سه‌ما
کچه‌كا ڕزگاربوویا ئێزدى ب ئيراده‌ييه‌كا پۆلايين و مه‌زن ڤه ب سه‌ر ئاسته‌نگييێن داعشێ دا ب سه‌ردكه‌ڤت و ده‌ستكه‌ڤته‌كێ ئه‌كاديمى ل وه‌لاتێ ئوستراليا ب ده‌ستڤه دئينت.
هانيا هادى، کچا ڕزگاربوویا ئێزدى دەستکەڤتەکێ مەزن ب دەستڤەدئینت ب دەرچۆنا خۆ ژ قوتابخانا ناڤه‌ندى یا (کۆفس هاربور – Coffs Harbour High School) بۆ پۆلا 12 (Year 12) یا سالا 2026ێ، و بوو خودانا ناسناڤێ (DUX 2026)، کو خەلاتەکە ب شێوەیەکى گشتی بۆ قوتابییێ ئێکەم یێ سەرکەفتی ل سەر ئاستێ قوتابخانێ یان قۆناغا وێ دئێتە دان، یان ئەو کەسێ بلندترین نمرەیێن ئەکادیمی ل قۆناغا خۆ بدەستڤە دئینت، ب تایبەتی ل پۆلا دوازدێ.
هەروەسا وێ سێ خەلاتێن ئەکادیمی یێن جودا و دیار ب دەستڤەئینان:
• EAL/D Achievement Award
• Ethical Dental Award – Biology
• Academic Awards
ژ ڕزگاربوونێ ژ ده‌رده‌سه‌رييێن داعشێ هەتا گەهشتن ب سەرکەڤتن و پێشەنگبوونێ ل ئوسترالیا، هانيا یا بەردەوامە ل سەر ڕێيا خۆ ب ئیرادە و هیڤی، دا کو ببتە چیرۆکەکا پڕ ژ ئیلهامێ بۆ پيداگێرييێ، هیڤی و ئاڤاکرنا پاشەڕۆژێ.