ناڤه‌ندا نووچه‌يان – سه‌ما
ده‌سته‌كا بلندا بنگه‌هێ لالش یێ ره‌وشه‌نبیری و جڤاكی ل دهۆكێ به‌ياننامه‌يه‌ك ده‌رباره‌ى ره‌وشا ده‌ڤه‌را شنگالێ به‌لاڤكر و راگه‌هاند، ئه‌ركێ به‌رپرسیاره‌تییا هه‌موو ئالییانه ب تایبەتی حکومەتا فیدڕال ب هەماهەنگی ل گەل حکومەتا هەرێما کوردستانێ، برینێن ئێزدییان ده‌رمان بکەن.
ده‌قێ به‌ياننامه‌يا بنگه‌هێ لالش:
هەموو کەس دزانن کو شنگال و ب تایبەتی پێکهاتەیێ ئێزدی تووشی كرێترین تاوانێن كۆمكوژییا بكۆم بوون ل ده‌مێ ئێرشا داعش بۆ سه‌ر شنگالێ ل سالا 2014ێ. و ژ بەر وێ تاوانا گران برینێن كوور د جڤاكێ ئێزدی دا هێلان و هەتا نهۆ نەهاتینە ده‌رمانكرن. گۆڕێن بکۆم، سەدان شەهیدان، ڕەڤاندنا هەزاران ژ دایک و خوشک و خۆشتڤییێن مە، ئاوارەبوونا دژوار و کۆچبەرییا ته‌عل، زێدەباری نەبوونا ئیداره‌یێ و خزمەتگۆزارییان.
ئه‌م دبینن كو ئه‌ركێ به‌رپرسیاره‌تییا هه‌موو ئالییان ب تایبەتی حکومەتا فیدڕال ب هەماهەنگی دگەل حکومەتا هەرێما کوردستانێ، برینێن ئێزدییان ده‌رمان بکەن و هەموو ئاریشەیێن مایی ب زمانێ دانوستاندنێن ب مفا و ئاڤاکەر چارەسەر بکەن.
ده‌ربارەی دەڤەرا شنگالێ ژی، ئەم ته‌كه‌ز دکەین کو شنگال پشکەک نەڤەقەتیایه ژ جوگرافییا هەرێما کوردستانێ، و دەستوورێ عێراقێ د مادەیا 140 دا ئازادییا هەلبژارتنێ دایە خەلکێ شنگالێ و دەڤەرێن دی یێن كوردستانی یێن ژ ده‌رڤه‌ی ئیدارا هەرێما کوردستانێ کو ببنە پشکەک ژ هەرێمێ یان بمینن ل ژێر دەستهەلاتا فیدڕال، ئەڤه ژی د ڕێیا پڕۆسەیا ڕاپرسییێ دا کو هاتییە دانان ل وێ دەڤەرێ، بۆ زانین کو خەلکێ شنگالێ و ب تایبەتی جڤاكێ مە یێ ئێزدی ب رێژا 93% ل ریفراندۆما سالا 2017ێ دەنگ دایە ژبۆ هندێ بكه‌ڤنه سه‌ر هەرێما کوردستانێ د چارچۆڤێ عێراقەکا فیدڕال دا کو مافێن هەموویان بێ جوداهی مسۆگەر بکەت.
و ل داوییێ ژى ئەم دوپاتیيێ ل سەر گۆتنا جەنابێ سەرۆک مەسعود بارزانی ڤە دکەین کو (ئێزدی بخۆ بڕیارێ ل سەر چارەنڤیسێ خۆ ددەن و نە ئالییێن سیاسی).
ده‌سته‌كا بلندا بنگه‌هێ لالش یێ ره‌وشه‌نبیری و جڤاكی/دهۆك
29/10/2026