ل ڕێككەفتی 11/11/2015 وەکو ئەرکەکێ وژدانی و ئەخلاقی و وەڵاتپارێزی و مللەتیێ ب ڕاسپاردێن سەركردایەتیا مە دیسان من(شێخ شامۆ)ب برا و كوڕ و دەوروبەرێن خوە و ڕاگەهاندنا لالش، نێزیكی 25 كەسا مە خوە گەهاندە سنوونێ و وێ شەڤێ ل مالا د.سلێمان فانۆ، سەرۆكێ بنگەهێ لالش تایێ سنوونێ شەڤین بووین و كاك مەحما خەلیل قایمقامێ شنگال و كاك نایف سەیدۆ رێڤەبەرێ ناحیا سنوونێ و چەند هەڤالێن دیتر ل دیوانا مە بوون و مە چاڤدێریا ڕەوشێ دكر و تەلەفون و دانوستاندنێن بەردەوام دگەل سەركردایەتیا مە هەبوون، بۆ دیرۆكێ بێژم كاك سیداد بارزانی برایێ جەنابێ سەرۆك بارزانی تەلەفون كر و هندەك ڕاسپاردە و شیرەتێن جەنابێ سەرۆك ب من ڕاگەهاندن، داكو ئەم ژێرە خزمەتكار بن.
ل سبەها ڕۆژا 12/11/2015ێ و پشتی نێزیكی سالەكێ ژ ڕزگاركرنا باكورێ شنگالێ، ب سەرپەرشتییا ڕاستەوخۆ یا جەنابێ سەرۆك مەسعود بارزانی ئۆپەراسیۆنا دیرۆكی یا ڕزگاركرنا باشورێ شنگالێ دەستپێكر. ئەم هێژ ل دەمژمێر حەفتی سبێ چوونە سەرێ چیایێ شنگالێ ژبۆ دیتنا ڤێ ئۆپەراسیۆنا دیرۆكی و مەزن.
ل دەمژمێر حەفتی سبێ، پێشمەرگەهێن قەهرەمان دەست ب پێشرەوییێ كر و فرۆكەیێن هەڤپەیمانان ل عەسمانا و پێشمەرگەهێن قەهرەمان ئاگر ب سەر تیرۆرستێن داعشێ دا باراندن، دیمەنێن گەلەك دلخوەشكەر بوون ب ڤێ هێزا مەزن ئاخا ئێزدیا ئاخا كوردستانێ بێتە ڕزگاركرن و ئەو دوژمن و درندێ پێل نامووسا ئێزدیا و كوردا كری بێتە رسواكرن و ژ ناڤبرن و ئەو سۆزا سەرۆك بارزانی دایی ئێزدیا بجی وەرە و سەرێ تیرۆرستا بكەڤە بن پێلاڤا زاڕۆكێن ئێزدیا.
هەر دگەل ئۆپەراسیۆنێ ستۆدیۆیا ڕووداو یا گەڕۆك و وارتیڤی ئەز مێڤان كرم و وەكو كەساتییەكی ئێزدی و سەرۆكێ سازییەكا گرنگا ئێزدیا (بنگەهێ لالش) و نوونەرێ ئێزدیا ل پەرلەمانێ كوردستانێ، مە شادی و دلخوەشیا خوە و ئێزیدخانێ و كوردستانێ ئانی زمان و ب ڕاستی چ ڕۆژ و دەم و دیمەن نە ژوان چاخا خوەشتر بوون. دیسان من شرۆڤەكرن دا زولما ل ئێزدیا هاتی كرن و ڕەوشا ئێزدی تێدا سەرێ بتری سالەكێ یە و هەروەسا ئۆپەراسیۆنا دیرۆكی یا ب سەرپەرشتییا جەنابێ سەرۆك بارزانی و ب خوون و خوەهدانا پێشمەرگەه و قۆناغا پشتی ڕزگاركرنا شنگالێ ب وژدان ئێخستنە ڕوو و مەبەستا من گەهاندنا پەیامەكا ساخلەم بوو، ژبۆ جڤاكا ئێزدی و كوردستانێ ب گشتی. چنكو جارا ئێكێ یە د دیرۆكێ دا فەرمانەك بێتە سەر ئێزدیا و ئێزدی نەدبێ خودان بن و سەرۆك و خەلكێ كوردستانێ بێن خوونێ ژبۆ تۆلڤەكرن و ڕزگاركرنا جڤاك و جوگرافیەتا ئێزدیا بكەن. هەتا بوو ئێڤار ئۆپەراسیۆن یا بەردەوام بوو لێ ل سەر ڕاسپاردێن ژۆرا ئۆپەراسیۆنا و زانیارییێن هەوالگیری كو تونێلێن مینكری ل دەوروبەرێن باژارێ شنگالێ د دانایی نە وێ شەڤێ پێشمەرگە نەچۆ ناڤا باژار داكو كێمترین زەرەر و زیان ئەڤ ئۆپەراسیۆن ب ڕێڤە هەرە. تیرۆرستێن داعش بەرگە نەگرت و زوو شكەستن و خوە ل بەر هێز و هەیبەتا پێشمەرگەی و پشتەڤانییا هێزێن هەڤپەیمانان یێن عەسمانی نەگرت.
وێ شەڤێ ئەم ل سنوونێ مان و ڕۆژا دیتر هێژ سبێ ل بەرپرسێن مە یێن لەشكەری گەریام و پشتی دەمەكی كورت، كاك ئاشتی كۆچەر مزگینییا چوونا ناڤ باژێرێ شنگالێ دا من و گۆت تیمێن پاقژكرنا مینا گەهشتنە ئاڤاهییێ لقا شنگال و ون دكارن وەرن، لێ هشیاری مین و تەقەمەنیا بن، ب حەماس و مراز مە بەرێ خوە دا ناڤ باژارێ شنگال مخابن وێران و خراب بوویە و ئەم گەهشتنە ئاڤاهییێ لقا 17 شنگال و مە و پێشمەرگە و بەرپرسێن حزبی و ئەمنی ئەو ڕۆژا دیرۆكی ب بلند کرنا ئالایێ رۆژێ ئالایێ پیرۆزێ کوردستانێ ل سەنتەرێ باژارێ شنگالێ ل هەڤدوو پیرۆزكر.
سەرۆك مەسعود بارزانی مزگینییا ڕزگاركرنا شنگالێ ل سەرێ چیایێ شنگالێ ڕاگەهاند
هەر ل وێ ڕۆژا دیرۆكی 13/12/2015ێ، جەنابێ سەرۆك مەسعود بارزانی د كۆنگرەیەكی ڕۆژنامەڤانی دا ل سەرێ چیایێ شنگالێ پەیام و مزگینییا ڕزگاركرنا شنگالێ ب گەلێ كوردستانێ و ئێزیدخانێ و هەموو جیهانێ ڕاگەهاند و ئەمركر:
گەلێ كوردستانێ، مە وەعد دا و مە وەعدێ خۆ بجھ ئینا، ئیرۆ ئەم یێل شنگالێ و ب تایبەت بۆ خووشك و برایێت مە یێت ئێزدی ئیسبات بوو كو هەموو گەلێ كوردستانێ پشت و پەنایێ وانە و ئەو بتنێ نینن، ئیسباتیش بوو كو ئێزدی بەشەكێ ڕەسەنن ژ گەلێ كوردستانێ.
سەرۆك بارزانی: ((ئیرۆ هەر تاكەكێ ئێزدی بلا سەرێ خۆ بلند كەت و یێ بێمنەت بت و بلا باوەری بخۆ هەبت و هەر كچەكا ئێزدی بلا ب دەنگەكێ بلند هاوار بكەت و بێژت، ئەز كچم كچا كوردانم، هێمایا شەرەف و بەرخودانم)). تولا وان هاتە ڤەكرن بڤێ سەركەفتنێ، تۆلا پێشمەرگا ب مەردایەتی یە و زۆر ب مەردانە تۆلا هەموو خووشك و برایێن ئێزدی ڤەكر.
بڤێ پەیام و مزگینییا جەنابێ سەرۆك یا دیرۆكی، دلخوەشییەكا مەزن كەڤتە د دلێ هەموو كوردستانێ و ئێزیدخانێ دا و سەرشۆری بوو بەهرا نەحەز و نەیارێن ئێزدیا و هەموو كوردستانێ. هەر ل ناڤ شنگالێ دا دگەل پێشمەرگەهان، مەژی وەكو ئەرك و وژدان ژبۆ میدیایێ ئاخفت و هەست و دەربرینا خوە دا دیاركرن جەنابێ سەرۆك سۆزا دایە ئێزدیا بجهئانی و ب خوونا پێشمەرگەی شنگال ڕزگاركر و تۆلا ئێزدیا هاتە ڤەكرن. هەروەسا ب ڕێیا میدیایێ داخواز ژ خەلكێ مەكر ژ بەر هەبوونا گەلەك مین و تەقەمەنیێن چاندی لەزێ نەكەن و نەچنە ناڤ مال و هەموو جها، هەتا كو تیمێن تایبەتمەند هەموویێ پشتراست و كۆنترۆل نەكەن.
پاشی جادە و جادە و ل سەر خوە و ب ڕێز ژ بەر مەترسییا هەبوونا مینا ژ هندروێ باژێر دەركەتن و گەهشتنە سەیارێن خوە و مە ب ئزنا خودێ بەرێ خوە دا دهۆكێ و زڤرینە مال وەستیایی و سیمان شەوتی ل بەر ڕۆژێ و هەوایا سار، لێ ب دلەكی خوەش ژ بەر ڕزگاركرنا ئاخا شنگالێ ب تمامی و ژناڤبرنا تیرۆرست و نەحەزا.
بۆ دیرۆكێ بێژم ژبۆ رزگاركرنا ئاخا كوردستانێ و ب تایبه‌ت شنگالا كۆكا ئێزدیخانێ ژ ره‌بیعه هه‌تا ب سه‌نته‌رێ باژێرێ شنگالێ ب قوبله‌ت و شه‌مال ڤه، پتری پێنجسه‌د پێشمه‌رگه‌هێن قه‌هره‌مان شه‌هیدكه‌تن و ب خوینا وان یا پیرۆز و برینداربوونا پتری دوو هه‌زار پێشمه‌رگه ئه‌ڤ داستانێن مه‌زن و دیرۆكی ب سه‌روه‌ریا سه‌رۆك مسعود بارزانی هاتنه توماركرن و لسه‌ر ده‌ستێ وان ئه‌فسانه‌یا تیرۆرستان هاته تێكشاندن ،و بوونه به‌شه‌كێ زێرین ژ سه‌روه‌ری و قوربانیدانێن بزاڤا ڕزگاریخوازا گه‌لێن كوردستانێ و هه‌می مرۆڤاتیێ.