شۆڕەشا 26ێ گولانا پێشکەفتنخواز، ل ساڵا 1976ێ وەک درێژەپێدانا شۆڕەشا ئیلوونا مەزن و بەرەڤانییەکا نوی بۆ ئارمانجێن نەتەوەیی دەستپێکر و بۆ گەلێ کوردستانێ بویە وەرچەخانەک مێژوویی د رێبازا خەباتا رزگاریخوازدا. ئەڤ شۆڕەشە نە بتنێ وەڵامەک بوو هەمبەر خیانەتا جەزائیرێ، بەلکوو دوبارە هەڵگرتنا ئاڵایێ خەباتێ ب ئیرادە و باوەرییەکا نەتەوەیی بوو.
پشتی رێککەفتنا خیانەتکاری یا جەزائیرێ و راوەستاندنا شۆڕەشا ئەیلوونێ، دوژمنان وا زانی کو دەنگێ خەباتا کوردستانێ هاتیە ژناڤبرن بەلێ رێنمایی و بیرڤەکرنا بارزانیێ نەمر ئەو هیڤیا گەلێ کوردستانێ نووکرەڤە. ب ئیرادەیا پولای یا هەردوو سەرکردێن مەزن سەرۆک مەسعود بارزانی و ئدریسێ جانەمەرگ، شۆڕەش جارەکا دی ژ خاک و چیایێن کوردستانێ هەڵقوڵی و دەست ب قۆناغەکا نوی یا تێکۆشینێ کر.
هەردوو سەرکردان ب هزر و شێوازەکێ نوی رێکخستنا پارتی و هێزێن پێشمەرگەی نوی کرنەڤە، مەفرەزەیێن پێشمەرگەی ل سەرتاسەری کوردستانێ هاتنە رێکخستن و خەباتا پارتیزانی ب شێوازەکێ مۆدێرن و کاریگەر دەستپێکر، د ماوەیەکێ کورتدا دەست ب چالاکیێن رێکخستنێ و رەوشەنبیری و هشیارکرنێ و چەکداریێ کرن ل هەمی پارچە و ناوچەیێن کوردستانێ و شۆڕەش بویە هیڤیا گەلێکێ بەرخودانکار.
پێشمەرگەهێن قەهرەمان، ب لیلیێن تڤەنگێن خۆ و بورەی و باوەریەکا بهێز هەمبەر هێرش و پیلانێن دوژمن ونەیاران راوەستیان و بەرسڤەکا توند و مێرخاسانە دان. خەتیرا شۆڕەشا گولانێ ب هەناسە و بێرکرنەوەکا نوی و سەردەمیانە هەلکر و ل چیایێن کوردستانێ دەهان داستانێن قارەمانەتیێ و فیداکاریێ ب ئازاییا پێشمەرگەیان هاتنە تۆمارکرن و نڤێسین.
ئێک ژ تایبەتمەندییێن گرنگ یێن شۆڕەشا گولانێ باوەری بفرەپارتی بوونێ و دیموکراسیێ بوو، شۆڕەش نە بتنێ خەباتەکا چەکداری یە بەلکوو بانگەوازەیەکە بوو بۆ ئاشتبوونا نیشتمانی و ئێکگرتنا هێز و لایەنێن کوردستانی. ل ڤێ چوارچوەیی دا بەرەیێ (جۆد) هاتە دامەزراندن و گیانێ هاوبەشیێ و یەکرێزیێ د ناڤ خەباتا کوردی دا بهێزتر بوو.
هەروەسا، پارتی دیموکراتی کوردستان شیا تۆڕا پەیوەندییێن خۆ ل سەر ئاستێن هەرێمی و نێودەوڵەتی بەرفرەهـ و بهێز بکەت و پرسا کوردی بگەهینیتە ئاستەکێ نوی، ئەڤ پەیوەندیین سیاسی و دیپلۆماسی بونە پشتەڤانییەکا گرنگ بۆ بەردەوامیا شۆڕەشێ و پاراستنا دەستکەفتێن وێ.
شۆڕەشا گولانێ هەمی پیلان و ستراتیژییێن حکومەتا بەعس یا وی سەردەمی تێکشکاندن، رۆژ بۆ رۆژ ئاگرێ خەباتێ گەشتر و بەرفرەهتر بوو هەتا کو ب حیکمەتا سیاسی یا سەرۆک مەسعود بارزانی هەمی هێز و لایەنێن کوردی ل بن سیهوانا بەرەیێ کوردستانی کۆمبون و ئەنجاما وێ ژی سەرکەفتنا سەرهلدانا پیرۆز یا بهارا 1991ێ بوو ئەو سەرهلدانا کو رێک بۆ ئازادی و خودبەڕێوەبەریا هەرێما کوردستانێ ڤەکری.
ئەڤڕۆ، دەستکەفتێن گەلێ کوردستانێ هەر ژ هەلبژارتن و دامەزراندنا پەرلەمان و حکومەتا هەرێمێ هەتا دگەهیتە کاروانێ ئاڤەدانیێ و پێشکەفتن و ئارامی هەمی ژ بەرهەمێ ئەو خەباتا درێژ و فیداکارییێن پێشمەرگە و خوینا شەهیدانە، ئەڤ ئازادییا کو گەلێ کوردستانێ نها تێدا دژیت ب هەزاران قوربانی و بەرخودان هاتیە پاراستن.
شۆڕەشا 26ێ گولانێ نە بتنێ پەڕەیەکا مێژووییە، بەلکوو سمبولا ئیرادە و خۆڕاگری و باوەریا گەلێ کوردستانێیە. گەلەکێ کو ل هەمبەر هەمی خیانەت و زۆردارییان هەر جار ژ نوو ڕابووە و خەباتا خۆ بەرەڤ ئازادی و سەروەریێ بەردەوام کریە.