د بيرهوهرييا 33 ههمين سالڤهگهڕا دامهزراندنا بنگههێ لالش يێ ڕهوشهنبيرى و كۆمهلايهتى دا، ئهو ناڤهندا شارستانى يا كو پشتى سهرهلدانا بهارا 1991ێ و ئازادبوونا پشكهكا دهڤهرێن ئێزدييان ژ دايکبووىى؛ ئهم ب شانازى ڤه ل بيرهاتنا وان كۆمهكا ڕهوشهنبيرێن ئێزدى دكهين يێن كو ب پشتهڤانييا بژاردهيا كوردستانى و پاشان حكومهتا ههرێما كوردستانێ، دهستپێشخهرى كرى بۆ دامهزراندنا دامهزراوهيهكا كو بوويه دهنگێ ناسنامه، ڕهوشهنبيرى و هشيارييا ئێزدياتى و كهلهپوورێ كوردى پێكڤه، و ههتا ئيرۆ ژى يا بهردهوامه د بهخشين و كارێ خۆ دا.
سوپاس و رێزگرتن بۆ ههموو ئهندام و دهستهيێن كارگێڕى، و بۆ وان پێنووسێن ئازاد و رووهن يێن كو پهياما بنگههى ب دلسۆزى و خۆڕاگرى د درێژاهيا دههسالێن بۆرى دا ههلگرتى، سهرهڕاى ههموو بارودۆخ و ئاستهنگييان.. ههروهسا سوپاسييهكا بێ كێم و كاسى بۆ وان ڕهوشهنبيرێن نه ئێزدى يێن كو پێنووسێن خۆ تهرخان كرى بۆ ب جهئينانا دادپهروهرييێ د دهرههقێ ئێزدياتييێ دا، و ب دلسۆزى و وهفادارى كار كرى دژى ههموو وان نڤيسينێن شێواندن و بهرزهكرنا ناسنامهيا ئێزديان دكر.
وەک نڤیسەر و ڤەکۆلەر د کاروبارێن کوردێن ئێزدی دا، ئەز ب شانازی ڤە دبێژم کو ئێک ژ دامەزرێنەرێن ئێکێ یێن ڤی بنگههى بووم، و بۆ چەندین سالان ژی سهرنڤيسهرێ گۆڤارا لالش یا وەرزی بووم. هەروەسا، ئەز شانازیيێ ب بزاڤێن هەموو لایەنان دکەم یێن کو گۆڤارا لالش کرینە مینبەرەکا ڕەوشەنبیری یا ناڤدار، ب ڕەنگەکێ کو دەنگڤەدان و ناڤ و دەنگێن وێ گەهشتینە جودا جودا کێبخانە و زانکۆیان و چەندین وەلات و کۆڕبەندێن ڕەوشەنبیری، دا کو ببتە شاهدەکێ زیندی ل سەر دەولەمەندیا کەلتوورێ ئێزدیيان و کووراتیا ڕەوشەنبیریيا کوردستانێ.
هەتا ئيرۆ ژی، ئەم پەیمان و وەفادارییا خۆ نوو دکەینەڤە کو د سەنگەرێ پێشييێ دا بمینین بۆ بەرەڤانیکرنێ ژ ئێزدیاتیيێ د ناڤ چوارچۆڤێ کوردایەتیيێ دا، چنکو ئێزدیاتی ب کووراتی و دیرۆکا کوردایەتیيێ دئێتە هەژمارتن. هەروەسا دێ د بەردەوام بین د پاراستنا بەهایێن پێکڤەژیانێ، کەرامەتێ و ناسنامەیا ڕەسەن دا.
هەروەسا سوپاسی و ڕێزگرتنەکا زۆر ئاراستەی ههموو سەرکردهيێن کوردستانێ دکەین، ب تایبەتی رێبهرێ کوردایەتیيێ جەنابێ مهسعود بارزانی و سهرۆك نێچیرڤان بارزانی، و هەروەسا جەنابێ سەرۆکێ حکومەتا هەرێمێ و نڤیسینگەها کاک مەسرور بارزانی کو هەردهم پشتەڤانێن بنگەهی بووینە، ژبۆ وێ گرنگی و پشتەڤانییا بەردەواما پێشکێشی ڤێ دەزگەهێ ڕەوشەنبیری و کۆمەلایەتی يێ دێرین کرى.
دیسا جەختێ ل سەر وێ یەکێ دکەینەڤە کو ئەم هەر تم پێشمەرگە بووینە و دێ مینین د ڕوویێ پیلان و پرۆژەیێن تەعریبکرنا زۆردارانە دا، ئەوێن کو دەستدرێژی کرینە سەر ئاخ و کەلتوورێ ئێزديیان و هەتا نوکە ژی بەردەوامن. دێ پێنووسێن مە هەر ب ئازادی و خۆڕاگری مینن بۆ بەرهنگاربوونا زۆرداری و پەراوێزخستنێ، و بۆ بەرەڤانیکرنێ ژ مافێن گەلێ مە و هەموو پێکهاتەیێن کوردستانێ ب گشتی.
ههزار سلاڤ ل سهر گيانێ هەڤالێن مە یێن دامەزرێنەر و پشتەڤانێن بنگههى یێن چۆينه بهر دلۆڤانيا خودێ بن، و ساخى و سلامەتی و تەمەن درێژی بۆ وان هەڤالێن ماین یێن کو بەردەوامن ل سەر بجهئینانا ڕێبازا بنگههى و پەیاما رۆهنبیری و کەلتووری.
هەروەسا، ژ دل داخوازا سەرکەفتنەکا مەزن بۆ کۆنگرێ پانزدێ دکەین، و هیڤیدارین کو بنگەهـ ب جێگیری و ب دەستکەفتێن مەزنتر بەردەوام بت ل سەر کاروانێ خۆ یێ پێشەنگ بۆ خزمەتکرنا جڤاکێ ئێزدی ب تايبهتى و کوردستانێ ب گشتی.