ناڤه‌ندا نووچه‌يان – سه‌ما
میر حازم تەحسین بەگ، میرێ ئێزدییان ل كوردستان، عێراقێ و جیهانێ و سەرۆکێ جڤاتا ڕۆحانى یا بلند يا ئێزدییان، پشکداری د کارێن کۆربەندێ ئێزدییان دا کر ل باژێرێ ئۆلدنبۆرگ یێ ئەلمانی. كو کۆمەکا کەساتییان ژ دەولەتا تورکیا و کەساتییێن ئێزدی ژ تورکیا و وەلاتێن دى تێدا پشكداربوون.
ب گۆڕه‌يى راگەهاندنا نڤیسینگەها جڤاتا ڕۆحانى یا بلند يا ئێزدییان به‌لاڤكرييه، کۆربەندێ ئێزدییان ل باژێرێ ئۆلدنبۆرگ ل ل رێككه‌ڤتى 31/10/2026 ده‌ست ب كارێن خۆ كر و بۆ ماوه‌يێ دو رۆژان يێ به‌رده‌وام بوو.
د دەمێ ڤى کۆربەندى دا میرى په‌يڤه‌ك پێشكێشكر و گۆت:”ئەڤ دیداره گرنگییەکا تایبەت وەردگرن، ژ بەر کو نوونەرێن دو کەمینەیێن ئۆلى کۆمڤەکرن کو رەهـ و ریشالێن وان یێن دیرۆکی و ناسنامەیا وان یا رەوشەنبیری ب هێزی ب تورکیا ڤە گرێدایى نە، ئەو ژی: ئێزدی و مەسیحی نە.”
هەروەسا دیارکر، هەردوو پێکهاتە خودان نەریتێن ئۆلى و رەوشەنبیری یێن سەدان سالانە. د هەمان دەم دا، تووشی ئاستەنگێن جۆراوجۆر بووینە و هێشتا ژی دووربینن ژ وانا، یێن گرێدایى ب جهێ وان یێ جڤاکی، مافێ وان د دیارکرنا چارەنڤیسێ ئۆلى دا، نیشتمانێ وان یێ دیرۆکی، و پاراستنا کەلەپوورێ وان یێ رەوشەنبیری.
تەکەز ل سەر وێ چەندێ ژی کر، ل ڤی سەردەمی فەر و پێدڤییە مسۆگەری ل سەر ئازادییا ئایینی ب ئاوایەکێ تەمام و بێ سنووردارکرن بهێتە کرن، و پرەنسیپێ یەکسانیێ د ناڤبەرا هەموو گرۆپێن ئایینی دا بێتە بجهئینان.
ئاماژە ب وێ چه‌ندێ ژی کر، پێدڤییە دانپێدان ب کەمینەیێن ئایینی بێتە کرن و بێنە پاراستن، و ناسنامەیا وان یا سەربەخۆ بهتە پاراستن. هەروەسا پێدڤییە كه‌نيبسه، مەزارگەهـ، گۆڕستان و جهێن دی یێن ئایینی یێن دیرۆکی بێنە پاراستن و نووژەن کرن.
د درێژاهییا گۆتنێن خۆ دا، میرى تەکەزى ل سەر گرنگییا مسۆگەرکرنا مافێن خودانکرنا مولک و ئەردێن دیرۆکی کر، دگەل چارەسەرکرنا بابەتێن گرێدای ب مولکداریێ ڤە ئەوێن هەتا نوکە ب هەلاویستی ماین.
د هەمان چارچۆڤە دا، ئاماژە ب گرنگییا رەخساندنا دەلیڤێ کر بۆ پاراستنا ئایین، زمان، نەریت و کەلەپوورێ رەوشەنبیری ب ئازادانە و بێی چ جیاوازی، و گەهاندنا وان بۆ نڤشێن داهاتی.
ل دۆر ئێزدییان ژی، داخوازیێن دیارکری هاتنە پێش، ژ وانژى: دانپێدانا ب وان وەک گرۆپەکێ ئایینی یێ سەربەخۆ، پاراستنا ناسنامەیا وان یا ئایینی، و مسۆگەرکرنا مافێن وان یێن دیرۆکی.
