بنگه‌هێ لالش به‌ياننامه‌يه‌ك به‌لاڤكر
ژ دەستپێكا دامەزراندنا دەولەتا عیراقێ نەخاسمە ل سالێن شێستا ژ سەدەیێ بۆری گەلەك لایەن بۆ مەرەمێن سیاسی یێن ڤەشارتی هەول ددەن ئێزدیان كو پشكەكا رەسەنن ژ مللەتێ کورد ژ رەی وریشالێن وان یێن دیرۆکی ببڕن.
ئۆلا ئێزیدی یا دێرین ژ ئێكەمێن ئۆلایە كو مللەتێ كورد باوەرییا خۆ پێ ئینایە و سەرەرای كارەساتێن دەم و دەورانە و ئەو زولم و زۆردارییا ل مە هاتییە كرن ژ دەستپێكێن دیرۆكێ تا رۆژا ئیرۆ، لێ مە كارییە كەلتۆرێ خۆ یێ روحی و رەسانەیەتییا رەگەزێ خۆ ب پارێزین، و هەموو تێكستێن پیرۆز یێن ئۆلا مە و درۆزە و رێ و رەسم ب زمانێ كوردی دئێنە گۆتن ب هەمان شێوەیێ ئۆلێن كوردستانێ یێن كەڤنار دئێنە گێران.
لێڤەگەرێن مە یێن ئاینی و دنیایی و هەموو ژێدەرێن دیرۆكی یێن جهێن باوەرییێ تەكەزیێ دكەن كو ئێزدیاتی ئێكەم سەركانییا كوردایەتیێ ئاڤ ژێ ڤەخواری و هەردوو دوو گیانن د لەشەكی دە،و زێدەباری هەڤپشكیا مە دگەل برایێن مە ژ ئاینێن دی یێن كوردستانێ د دیرۆك و جوگرافییێ و كەلتۆر و زمانی دە، هەروەسان پەرستگەها سەرەكی یا ئۆلا مە ئەوژی پەرستگەها پیرۆزا لالشە دكەڤیتە دناڤ جەرگێ كوردستانێ دە.
لەوما ئەم وەكو بنگەهێ لالش یێ رەوشەنبیری و كۆمەلایەتی دبینین كو كاركرن ل دان پێدانێ ب جێنۆسایدا ئێزدییان ژ ئالیێ دادگەها تاوانا یا نیڤ دەولەتی ڤە ژبۆ جێبەجێكرنا دادپەروەریێ و سزادانا تاوانبارا و قەرەبووكرنا قوربانیا و ئاڤەدانكرنا دەڤەرێن ئێزدیان نەخاسمە شنگالا بریندار دگەل ئاساییكرنا رەوشا وێ دوور ژ هەڤركیێن سیاسی و دیاردەیێن چەكداری دڤێت ژ كارێ مە هەمووا یێن پێشین بن دوور ژ هەر تشتێ برینێن مە كوورتر بكە شوونا كو دەرمان بكە.
هەروەها ئەم بانگەوازییا خۆ دگەهیننە هەموو ئالیێن ئێزدی ب ئارستەیێن خۆ یێن هزری و سیاسی یێن جودا جودا ڤە كو ئەم پێكڤە تفاق و تەباییا خۆ كۆكتر بكەین دەربارەی هەر بابەتەكێ گرێدایی ب جڤاكی مە ڤە و دگەل خورتكرنا پەیوەندیێن برایانە دگەل هەموو پێكهاتێن كوردستانێ و عیراقێ ژبۆ خێرا مە هەموویان.
ل دوماهیێ ئەم داخوازێ ژ حكومەتا فیدرال و هەرێما كوردستانێ دكەین كە هەموو مافێن پێكهاتا ئێزدی بهێنە زامنكرن و ئێزدیان بەژدار كن د هەموو جۆمگێن سیاسی و ئیدارەكرنا دەولەتێ دە ئەوژی ل پەی پرەنسیپێن دادپەروەرییا جڤاكی یێن داكۆكیێ ل وەكهەڤییا هەموو پێكهاتان دكەن ل ماف و ئەركان بێ جیاوازی.
بنگەهێ لالش یێ رەوشەنبیری و كۆمەلایەتی
22/6/2024