ئێزدی بنەكۆكا كوردانن
بەختیار قادر
هێشتا ئێزدی ژ دەرئەنجامێ جینۆسایدێ ل شنگالێ یێ دنالن و ل جهێ كار بێتە كرن بۆ كەیسا جینۆسایدێ،بەروڤاژی بزاڤێن گوهۆرێن و بەرزەكرنا ناسنامەیا وان ل عێراقێ یێ دئێتە كرن ژلایێ هندەك كەسێن شۆڤێنی ڤە،جڤاكا ئێزدی ڤی كارێ مەترسیدار رەت و شەرمەزار دكەن ژبەركو ئەڤ كارە بەردەوامیدانە دانە ب جینۆسایدكرنا مللەتێ ئێزدی.
تیرۆرستێن داعش ل سالا 2014 نكارین ئێزدیا ژناڤ ببەن و ئەڤ كارێ نۆكە ل پەرلەمانێ عێراقێ دئێتە كرن مەرەم پێ ئەوە ئێزدیان ژناڤ ببەن و ئێزدی دناڤ عیراقێ دا بەرزە بین،دڤی سەردەمی دا و ڤی بارودۆخێ هەستیار و نەخۆشێ ئێزدی و ئێزدیاتی تێرا دەرباز دبن هەولدان بۆ گوهۆڕینا ناسناما نەتەوەی و دیموگرافیا ئێزدیا نە كارەكێ غەریبە و دیرۆك دیدەڤانە ئەڤ هەولە د درێژاهیا دیرۆكێ دا هەر هەبووینە و بەلگە 74 فەرمانێن ئێك ل دووڤ ئێكێنە ،كو ئارمانج ژێ ژناڤبرنا دین و نەتەوە و ئاخا ئێزدیا بوویە،ئەڤ پیلان ژبۆ كێمكرنا پێگەهێ كوردان بوویە، وهەر جارا نەحەزێن كوردستانێ ڤیان دربا خۆ ل كوردان بدەن،پێكهاتەكی بكار دئینن،لێ دیرۆك وناسناما مە یا كوردی یە موكومە و بۆ كەسی نائێتە قەبوولكرن كو دووسێ هزار دەنگەك ئیناین و باسێ گوهۆڕینا ناسناما مەیا كوردی بكەت،پێویستە بابەتێ ناسنامەیا نەتەوەیی یا ئێزدیان(هێلا سۆر) با و ب هیچ ڕەنگەكی تێكەلی بابەتێن سیاسی و بەرژەوەندێن بەرتەنگێن چەند كەس و لایەنا نەبا، كو ل گۆڕەی هەموو بەلگەیێن مێژوویی، و تێكستێن ئاینی و زمان و چاند و داب و نەریت و ڕێورەسم و ژیانا ڕۆژانە، ئێزدی كوردێن ڕەسەنن و بەشەكێ رەسەن و نەڤەقەتیایێ جڤاكێ كوردستانێ نە،وەكو ئێزدی و ئێزدیاتی، د ئالیێ دین و پیرۆزی، زمان و چاند و كلتۆر، دیرۆك و ئاخ و جوگرافیا و شوناس و سەدان بەلگەیێن دیتر وێ چەندێ پشت راست دكەن كو ئێزدی ڕەها هەری كەڤنار و بنەكۆكا كوردانە.
جەنابێ سەڕۆك بارزانی پشتی سەرهلدانا 1991ێ ئەڤ حەقیقەتا دیرۆكی ئانی زمان و ئێزدی ب ڤی دروشمێ یەكلاكەر خەلاتكرن و كەرەمكر:”یان كەس نینە ب ناڤێ كورد، یان ئەسلترین كورد ئێزدینە”،دیسان ل گەلەك مەحفەل و هەلكەفتا سەرۆكی تەكەزی ل وێ چەندێ كریە كو ئێزدی دێ بریارێ ل چارەنڤیس و هەبوونا خۆ دەن و كەسێ دی ماف نینە ل جهێ ئێزدیان بریارێ بدەت.
هەروەسا بەرامبەری ڤێ دوژمنكاریێ دڤیا جڤاكا ئێزدی ب هەموو تەخ و چینێن خۆڤە ب ئاگەه و هشیار و ب هەلویست بن، و ڕایا گشتی یا كوردستانی و عیراقی و جیهانی بێخنە بەر بەرپرسایەتیێ و ڕێ ل ڤان بزاڤان بگرن و بێژنە هەموو جیهانێ 74 فەرمانا نكاری ناسناما مە یا ڕەسەن بگوهۆرت،لەورا نابت ئێزدی ببنە پالێن دوژمنان و كوردایەتیێ و ئێزدیاتیێ ژێك جودا بكەن ب ڕێیا لڤاندنا هەست و سۆزێن ئێزدیان پشتی ڤێ جینۆسایدا داویێ،لەورا پێتڤیە ئێزدی بهێزتر بن بۆ مانا خۆ چنكو ئێزدیاتی و كوردایەتی ئێك روحن ئەگەر ئێزدیاتی نەما كوردایەتی نامینت و ئەگەر كوردایەتی نەما ئێزدیاتی نا مینت،ئەم كوردێن ڕەسەنین و پتریا ئێزدیان دانپێدانێ ب كوردبونا خۆ دكەن.
پێدڤیە ئێزدی ب رژدی هشیاری ڤێ پیلانێ ببن و بێ دەنگ نەمینن و هەموو هەلویستی وەربگرن ل دژی ڤی كاری كو مەترسی ل سەر پاشەرۆژان ئێزدیان هەیە،ب تنێ ئارمانجا دووژمنی ئەوە ئێزدیان ژ كوردستانێ جودا بكەن و پرت و بەربەلاڤ بكەن و دەرزەكێ ل ناڤمالیا ئێزدیان بدەن.
