دوهی 40 نۆژدارێن ئێزدی بەشداری کۆنفرانسێ میزۆپۆتامیا ل هەولێرا پایتەخت بوون، بۆ بتر ئاشنابوونێ ب دیرۆک و کەلتوور و ڕەهوڕیشالێن ئۆلا ئێزدییان یا کەڤنار، ئیرۆ سەرەدانا پەرستگەها لالش یا پیرۆز کرن و ژ ئالییێ میر “حازم تەحسین بەگ ” میرێ ئێزدییان ل کوردستان، عێراق و جیهانی و بابەشێخێ ئێزدییان و جۆقەتا وی و ئەندامێن مەجلسا ڕۆحانی یا ئێزدییان، پێشوازی لێ هاتە کرن، و لالشا نوورانی گەڕییان و سەرەدانا قوب و نیشانگەهـ و کانییا سپی و هتد کرن.
ب کورتی و کوردی ئەز ڤێ بەشدارییا وان بلند دنرخینم و دخوازم هەردەم سەرکەفتی بن و خزمەتا گەل و وەلات و خەلکێ خۆ بکەن و داهێنانێن پزیشکی یێن جۆراوجۆر بکەن بۆ خزمەتا مرۆڤاتییێ ب گشتی و جڤاکا ئێزدییان ب تایبەتی، وەک هوون ژی دزانن ئێزدی د کەمپاندا ئاوارەنە ئەڤە بتر ژ یازدە سالانە د دۆخەکێ بزەحمەت یێ ژیانێ دا د کەمپان دا ژیانا خۆ دبەنە سەر. د کەمپێن ئاوارەیان دا ڕەوشا ساخلەمییا گەلەک کەسان نەیا باشە و ب سەدان نەخۆش هەیە ب نەخۆشییێن جۆراوجۆر و پێدڤی چارەسەرییا پزیشکی نە، نەخاسمە نەخۆشێن کو نەخۆشییێن دەروونی هەین، پێدڤی ب چارەسەرییێن کلینیکی و جەلسەیانە،فەرە گرنگی پێ بهێتە دان و بەردەوام چاڤدێرییا وان بهێتە کرن، هەروەسا گەلەک حالەتێن کێمئەندامان هەنە کو پێدڤی ئامێرێن پزیشکی یێ سەردەمن، ب دیتنا من فەربوو ئەوان نۆژداران هزر د ئەڤێ چەندێ کربا و هەر چو نەبت حالەتێن ئەوان نەخۆشان د هندەک کەمپان دا دیتبان و چارەسەری بۆ نڤیسیبان و ب ڕێکا ڕێکخستییێن ناڤدەولەتی یێن نەحکومی NGO داخوازا چارەسەر کرن و دابینکرنا پێدڤییێن پزیشکی کربان.
ئەم هیڤیدارن ئەو نۆژدارنە هزر د کارێن خێرخوازی و مرۆڤاتییێ دا بکن و هاریکارییێن پزیشکی ژ هەموو ئالییەکێ ڤە بۆ نەخۆشێن ئاوارە یێن د کەمپان دا دابین بکەن و کارەکێ مرۆڤاتی و ئەخلاقی یە ڤێ چەندێ بێبەرانبەر بۆ ئەوێ تەخا بێگونەهـ بکن، یا د شیاندا بوو و د شیان دا یە ئەڤ چەندە هاتبا کرن:
1. بینینا ڕەوشا ساخلەمی یا چەند نەخۆشان د کەمپان دا و هەر چو نەبت ب گشتی ڕەوش دیتبا.
2. دابینکرنا چەند کەرەستەیێن پزیشکی بۆ چەند نەخۆشان، وەکو کورسی و ئامێرێن هەناسەدانێ و هتد.
3. دابینکرنا دەرمانێن پێدڤی و کاریگەر بۆ کۆمەکا نەخۆشان.
4. گرنگیدان ب زاڕۆکێن نەخۆش ب گشتی.
5. تۆمارکرنا حالەتێن کو چارەسەرییا وان ژ دەرڤە هەی و بزاڤکربان د دەمێن بێت دا ڕەوانەی ژ دەرڤە کربان بۆ چارەسەرییا پێدڤی.
6. هاریکارییا ڕزگاربوویێن کو نەخۆشی هەین.