ناسنامەیا نەتەوەیی یا ئێزدیان “هێلا سۆرە”
عەلی جۆقی
پێویستە بابەتێ ناسنامەیا نەتەوەیی یا ئێزدیان “هێلا سۆر” با و بهیچ رەنگەکی تێکەلی بابەتێن سیاسی و بەرژەوەندێن بەرتەنگێن چەند کەس و لایەنا نەبا، کو ل گۆری هەموو بەلگەیێن مێژوویی، و تێکستێن ئاینی و زمان و چاند و داب و نەریت و رێ رسم و ژیانا رۆژانە، ئێزدی کوردێن رەسەنن و بەشەکی رەسەن و نەڤەقەتیایێ جڤاکێ کوردستانێ نە.
ل گۆر دیتنا مە بگرە و ڤەکێش و دان وستاندن ل دۆر دیارکرن و دەستنیشانکرنا ناسنامەیەکا نەتەوەیی بۆ ئێزدیان نیشانا بێ تیفاقی و نە ئێکگرتن و پرت و بەلاڤەیا ناڤمالا ئێزدی و کێم بوونا رۆلێ دەستهەلاتا دینی یا ئێزدیان و لاوازی و بێ هەلویستیا کەسایەتیێن ئێزدی یێن سیاسی و رایەدار و خودانێن بەرژەوەندێن کەسی یێن ل هەردو حکومەتێن هەولێر و بەغدا، چونکی براستی ژی ناسنامەیا نەتەوەیی نە ب زۆری د هێتە دان و نەژی ب زۆری د هێتە سەپاندن.
بەروڤاژی دڤێت ناسنامەیا نەتەوەیی یا کوردێن ئێزدی ژ ڤەرێژا دادپەروەری و وەکهەڤیا جڤاکی و سیاسی و ئابووری و رۆشنبیری ل ناڤ جڤاک و حکومەتا هەرێمێدا خۆرتتر بایە، و ب ئەڤی ئاوایی تاکەکەسێ ئێزدی دێ باشتر هەست ب ژێیاتییا خۆ یا نەتەوەیی کربا.