“ئێزدی ئه‌سڵێ كوردانه و ئێزدی بێ ئه‌سڵیێ قه‌بوڵ ناكن”
نێچیرڤان شێخ شامۆ
وه‌كو ئێزدی و ئێزدیاتی، د ئالیێ دین و پیرۆزی، زمان و چاند و كلتۆر، دیرۆك و ئاخ و جوگرافیا و شوناس و سه‌دان به‌لگه‌یێن دیتر وێ چه‌ندێ پشت راست و عه‌سه دكه‌ن كو ئێزدی ڕه‌ها هه‌ری كه‌ڤنار و بنه‌كۆكا كوردانه.
له‌وما سه‌ڕۆك بارزانی پشتی سه‌رهلدانا ١٩٩١ێ ئه‌ڤ حه‌قیقه‌تا دیرۆكی ئانی زمان و ئێزدی ب ڤی دروشمێ یه‌كلاكه‌ر خه‌لات كرن و كه‌ره‌مكر:
“یان كه‌س نینه ب ناڤێ كورد، یان ئه‌سلترین كورد ئێزدینه”.
دڤی سه‌رده‌می دا و ڤی بارودۆخێ هه‌ستیار و نه‌خوه‌شێ ئێزدی و ئێزدیاتی تێرا ده‌رباز دبن هه‌ولدان بۆ گوهه‌رینا ناسناما نه‌ته‌وی و دیموگرافیا ئێزدیا نه كاره‌كی غه‌ریبه و دیرۆك دیده‌ڤانه ئه‌ڤ هه‌وله د درێژاهیا دیرۆكێ دا هه‌ر هه‌بووینه و به‌لگه ٧٤ فه‌رمانێن ئێك ل دوف ئێكێنه ،كو ئارمانج ژێ ژناڤبرنا دین و نه‌ته‌وه و ئاخا ئێزدیا بوویه.
ده‌رئه‌نجامێ داوی كۆمكوژی و فه‌رمان ئه‌وا ل سه‌ر ده‌ستێ تیرۆرستێن د١عش ب سه‌رێ ئێزدیان هاتی ل شنگال، دیساژی ئێزدیان ب خوین و قوربانی دان و به‌رخودان “سه‌رێ خوه دان و سور و دین و ئاخ و هه‌بوونا خوه نه‌دان”.
ده‌رئه‌نجام دوژمن وخودێ نه‌ناس داگیركه‌ر ژناڤ چۆن و ئێزدی هه‌ر مان، ڤان هه‌می فه‌رمان و هه‌وڵان نكاریه ناسناما ره‌سه‌نا ئۆلی و نه‌ته‌وی یا ئێزدیان بگوهه‌رن.
وساژی ئێرۆ رۆژ هه‌وله‌كا قرێژی یا بڤی جۆره‌ی ل په‌رله‌مانێ عراقێ هاتیه دان داكو ئێزدیا ژ كوردبوونا وان جودا بكه‌ن،ڤێ یه‌كێ د چارچۆڤه‌یێ بازاركرن و گڤاشه‌كا سیاسی و شێواندنا دیرۆكێ ته‌ماشه دكه‌ن و ژ ماف و ده‌ستهه‌لاتێن یاسایی و دیموكراسی یێن په‌رله‌مانا عراقێ نینه بریارێ ل چاره‌نڤیس و ناسنامه‌یا ئێزدیان هیچ پێكهاته‌كا دیتر بده‌ت.
دیسان ل گه‌له‌ك مه‌حفه‌ل و هه‌لكه‌فتا سه‌رۆكێ ئاشتی خواز كاك مه‌سعود بارزانی ته‌كه‌زی ل وێ چه‌ندێ كریه كو ئێزدی دێ بریارێ ل چاره‌نڤیس و هه‌بوونا خوه ده‌نو كه‌سێ دی ماف نینه ل جهێ ئێزدیان بریارێ بده‌ت.
ب راستی په‌رله‌مان و ده‌ستهه‌لاتدارێن عراقێ چ نه‌مایه بۆ ئێزدیا نه‌كرین!؟ ڤێجا ب تنێ ئه‌و مایه ناسنامه‌یه‌كا نوو بۆ ئێزدیا دیاركن و ل قه‌له‌م بده‌ن.
به‌رامبه‌ری ڤێ دوژمنكاریێ دڤیا جڤاكا ئێزدی ب هه‌می ته‌خ و چینێن خوه‌ڤه ب ئاگه‌ه و هشیار و ب هه‌لویست بن، و رایا گشتی یا كوردستانی و عراقی و جیهانی بێخنه به‌ر به‌رپرسایه‌تیێ و رێكێ ل ڤان بزاڤان بگرن و بێژنه هه‌می جیهانێ ٧٤ فه‌رمانا نكاری ناسناما مه یا ره‌سه‌ن بگوهه‌ره، چونكه
“ئێزدی ئه‌سڵێ كوردانه و ئێزدی بێ ئه‌سڵیێ قه‌بوڵ ناكن”.
