بنگه‌هێ لالش په‌نه‌له‌ك ل دۆر10ساڵيا جينۆسايدا ئێزديان ل دارخست
سه‌ما
ئێڤارييا ئيرۆ رۆژا پێنج شه‌مبوويێ 25ى تيرمه‌ها 2024ێ،ل باره‌گايێ بنگەهێ لالش یێ ڕەوشەنبیری و کۆمەلایەتی ل دهۆكێ پەنەلەک ل دۆر( 10 ساڵ ژ جینۆسایدا ئێزدیان و کەتوارێ ئێزدیان وبەرەنگاریێت پاشەرۆژێ) بۆ “د. سه‌عه‌د سلوم” سەرۆکێ سازییا مەسارات و مامۆستایێ پەیوەندیێن نێڤ دەولەتی ل زانینگەها مستەنسریە ب ڕێڤه‌چوو.
ل پێشه‌كيێ خۆله‌كه‌كا ڕێزگرتنێ ڕاوه‌ستيان ل سه‌ر گيانێ پاكێ جانگۆريان و سه‌روه‌رێ وان بارزانيێ نه‌مر و كاك ئدريسێ هه‌رده‌م ساخ،پاشان به‌رێز “سه‌عيد جردۆ” سه‌رۆكێ بنگه‌هێ لالش دپه‌يڤه‌كێ دا بخيرهاتنا ئاماده‌بوويان و دكتۆرى كر و لدووڤدا په‌نه‌لى ب ئاماده‌بوونا هه‌ژماره‌كا كه‌سايه‌تى و ئه‌كاديمى و په‌رله‌مانتار و ڕه‌وشه‌نبيران ده‌ستپێكر.
د. سه‌عه‌د سلوم ،سەرۆکێ سازییا مەسارات باس ل جینۆساید و کەتوارێ ئێزدیان كر و دياركر،ساخكرنا بيره‌وه‌رييا ده‌هێ يا جينۆسايدێ يا گرنگه بۆ جڤاكێ نێڤ ده‌وله‌تى،هه‌تا نۆكه چه‌ندين وه‌لاتان دانپێدان پێ كريه و ئه‌ڤه بۆ ڤى كه‌يسى پێنگاڤه‌كا زۆر گرنگه هاتى كرن،هه‌روه‌سا پشتى جينۆسايدێ نفشه‌كێ نوو يێ ئێزديان په‌يدابوويه و زێده‌تر يێ هشياره و داكۆكيێ ل سه‌ر ماف و داخوازيان دكه‌ت و ئه‌ڤه حاله‌ته‌كه به‌رى نۆكه نه‌بوويه و ب كاره‌كێ ئه‌رێنى دبينين.
د ئاليه‌كێ دى دا د. سه‌عه‌د سلوم ئاماژه دا بزاڤێن حكومه‌تا هه‌رێما كوردستانێ بۆ ڕزگاركرنا گرتيێن ئێزدى و باده‌كا ئاواره‌يان ل كه‌مپاندا و دياركر رێكخراوێن ئێزديان ڕۆله‌كێ باش دگێرن دئاڤه‌دانكرنا شنگالێ دا و ئيرۆ پتر ژ وه‌زارتێن عيراقێ كاردكه‌ن.
هه‌روه‌سا سەرۆکێ سازییا مەسارات تيشك ئێخسته سه‌ر پێگه‌هێ ستراتيژيێ شنگالێ و هه‌بوونا هه‌ڤركى و به‌رژه‌وه‌نديێن نێڤ ده‌وله‌تى ل سه‌ر وێ ده‌ڤه‌رێ و خواست شنگال ببته پارێزگه‌هـ وه‌ك پشكه‌كا سه‌ره‌كى ژ دادپه‌روه‌ريێ.
ناڤهاتى دوپاتكر،ل سه‌ر جڤاكێ نێڤ ده‌وله‌تى پابه‌ندى سۆزێن خۆ بت بۆ پشته‌ڤانيكرنا جڤاكا ئێزديان و دياركر دقۆناغا ئيرۆ دا جڤاكێ ئێزدى پێدڤى ب دانوستاندنا ناڤخۆيێ هه‌يه.
پاشان ده‌رگه‌هێ دانوستاندنێ دناڤبه‌را دكتۆرى و ئاماده‌بوويان دا هاته ڤه‌كرن و چه‌ندين پرسيار و بير و بۆچۆن ده‌رباره‌ى كه‌يسا جينۆسايدێ پێشكێشكرن،بۆ هندێ ل سه‌ر ئاستێ ده‌ولى زێده‌تر كار ل سه‌ر ڤى كه‌يسى بێته كرن و ب جينۆسايد بێته ناسين و پشته‌ڤانى جيهانێ بۆ ئێزديان دوپات بكه‌ن.
ب رێڤه‌چوونا ڤى په‌نه‌لى هه‌ڤده‌مه دگه‌ل نێزيكبوونا بيره‌وه‌ريا ده‌هێ يا سالڤه‌گه‌را جينۆسايدا ئێزديان ل سه‌ر ده‌ستێ رێكخراوا داعش يا تيرۆرستى،كو ژ ده‌رئه‌نجامێ وێ هێرشى پتر ژ هه‌زار كه‌سێن ئێزدى هاتنه كوشتن و 6417كه‌سێن دى هاتنه گرتن و نێزيكى 360 هه‌زار خه‌لكى ده‌ربه‌ده‌ر و ئاواره‌بوون.
برياره ل ڕۆژا 3/8/2024ێ سالڤه‌گه‌را ده‌هێ يا جينۆسايدا ئێزديان ب چه‌ندين چالاكيان ل شنگال و ده‌ڤه‌رێن هه‌رێما كوردستانێ بێته ساخكرن.
