حكومەتا هەرێمێ 100 كورسیێن خواندنێ بۆ رزگاربوویێن ئێزدی تەرخان كرن
سه‌ما
حكومەتا هەرێما كوردستانێ ل بەر رۆناهییا فەرمانا مەسروور بارزانی، سەرۆكێ حوكمەتا هەرێما كوردستانێ، پرۆژەكی دی یێ خواندنێ بۆ ڕزگاربوویێن ژێر دەستێ داعش ڕاگەهاند،ئەندامه‌كێ دەستەیا بلندا بنگەهێ لالش ل دهۆكێ ژی دبێژیت: بۆ سالا 2024 ـ 2025، حوكمەتا هەرێما كوردستانێ 100 كورسی بۆ رزگاربووییان تەرخان كرینە.
جەعفەر سمۆ، ئەندامێ دەستەیا بلندا بنگەهێ لالش ل دهۆكێ راگەهاند، راگەهاندنا پرۆژێ خواندنێ بۆ كچێن ئێزدیێن رزگاربوویی ل ژێر دەستێ تێرۆرستێن داعش مزگینیەكا مەزنە بۆ جڤاكێ ئێزدی كۆ مەسرور بارزانی یە، سەرۆكێ حكومەتا هەرێما كوردستانێ گەلەك پشتەڤانیا ئێزدیان و هەموو پێكهاتەیێن كوردستانێ دكەت بەری نوكە ژی پرۆژێ پشتەڤانیا دارایی بۆ كچێن ئێزدی هاتبوو راگەهاندن نوكە ژی پرۆژێ پشتەڤانیا رزگاربوویان بۆ خواندنێ هاتە راگەهاندن.
ئاشكرا ژی كر، ژ ئەنجامێ زۆلما تێرۆرستێن داعش گەلەك كچێن رزگاربوویی نەدشیا بەردەوامیێ بدەنە خواندنا خۆ نوكە هەموو رزگاربوویێن ئێزدی دشین بخوینن و ئەڤ پرۆژە دێ گەلەك خزمەتا رزگاربوویان كەت.
ئەو ژێ راگەهاند، بۆ سالا 2024 ـ 2025، حوكمەتا هەرێما كوردستانێ 100 كورسی بۆ رزگاربووییان تەرخان كرینە و گۆت: رەنگە بەری نوكە ژیێ رزگار بوویان رێگر بیت بۆ خواندنێ، لێ نوكە وەزارەتا پەروەردێ ئەو بڕگە بۆ وان راگرتییە.
سەعید جردۆ، سەرۆكێ دەستەیا بلندا بنگەهێ لالش یێ رەوشەنبێری و جڤاكی ل دهۆكێ دیار كر، پالپشتیكرنا ڕزگاربووییان د ئالیێ كەرتێ خواندنێ دا ژلایێ حكومەتا هەرێما كوردستانێ پێنگاڤەكا گرنگ و د جهێ خۆدایە و گۆت: حكومەتا هەرێمێ هەموو پێنگاڤان د هاڤێژت ب هەر ئاوایەكی خزمەتا ڕزگاربوویان بكەت و ژ ئێش و ئازارێن وان كێم بكەت.