سه‌ما
ئه‌ندامه‌كێ جڤاتا پارێزگه‌ها نه‌ينه‌وا ئاشكه‌راكر، پێدانا چار مليۆن ديناران وه‌كو قه‌ره‌بوويا خه‌لكێ شنگالێ يا كێمه و ل ئاستێ پێدڤى دا نينه.
ل رؤژا ئێك شه‌مبوويێ 4ى ته‌باخا 2024ێ،جه‌مال خدر شه‌شو،ئه‌ندامێ جڤاتا پارێزگه‌ها نه‌ينه‌وا ل سه‌ر فراكسيۆنا پارتى ديموكراتى كوردستان بۆ سه‌ما راگه‌هاند، ل جڤاتا پارێزگه‌ها نه‌ينه‌وا و په‌رله‌مانێ عيراقێ ژى ئه‌م پشته‌ڤانيێ دكه‌ين خه‌لكێ شنگال ڤه‌گه‌رته ده‌ڤه‌رێ،به‌لێ نه بڤى شێوێ پرۆگرامێ وه‌زاره‌تا كۆچ و كۆچبه‌رێن عيراقێ بۆ ڤه‌گه‌ريانا ئاواران دانايى،دخوازين حكومه‌تا عيراقێ ب زۆرى ئاواران ڤه‌نه‌گه‌رينت.
سه‌باره‌ت قه‌ره‌بوويا خه‌لكێ شنگالێ،ئه‌و ئه‌ندامه دبێژت:پێدانا چار مليۆن ديناران ب ئاواره‌يێن ڤه‌دگه‌رنه شنگال وه‌كو قه‌ره‌بووكرن يا كێمه و ل ئاستێ پێدڤى دا نينه،ئه‌ڤه چه‌ند سالن هنده‌ك ژ ئاوارێن ڤه‌گه‌رياين هه‌تا نۆكه چه‌كێن قه‌ره‌بووكرنێ وه‌رنه‌گرتينه و گه‌له‌ك ژ ئه‌وێن وه‌رگرتين ژى دراڤ ل چه‌كێن واندا نينن.
ئاماژه ب وێ چه‌ندێ دا دخوازين حكومه‌تا عيراقێ پتر كار بكه‌ت ل سه‌ر پرسا شنگالێ و ڤه‌گه‌ريانا ئاواره‌يان بۆ سه‌ر جهـ و وارێن خۆ ڤه.
هێشتا پرانیا ئێزدیان د ئاواره‌یێ و د كه‌مپان دا دژین ژ به‌ركو ره‌وشا شنگالێ و ڤه‌گه‌ریانا ئاواره‌یان نه‌هاتیه جێبه‌جێكرن و داوى ب نه‌خۆشى و ئێشێن خه‌لكێ شنگالێ نه‌هاتیه، ده‌سته‌لاتا ده‌ڤه‌رێ ژى نه‌ڤه‌گه‌ریایه ده‌ستێ خه‌لكێ ره‌سه‌نێ شنگالێ. ئه‌ڤه ژى نیگه‌رانى ل جه‌م ئاكنجیێن د ناڤ كه‌مپێن پارێزگه‌ها دهۆكێ دا چێكریه و داخواز دكه‌ن كو ره‌وشا ده‌ڤه‌را وان ئاسایى بێته‌كرن.