سه‌ما
سەرۆک بارزانی ئيرۆ ل سەلاحەددین پێشوازی ل بالیۆزێ بریتانیا کر و هەردو ئالییان دانوستاندن ل سەر رەوشا دەڤەرێ ب گشتی و عیراقێ ب تایبەتی کرن.
رۆژا دووشه‌مبێ 5ێ ئابا 2024ێ ل سه‌لاحه‌ددین سه‌رۆك مه‌سعود بارزانی پێشوازی ل به‌رێز ستیڤن هیتچن بالیۆزێ برێتانیا ل عێراقێ كر.
د ڤێ هه‌ڤدیتنێ دا به‌حس ل دویماهین روودان و ئالۆزیێن ده‌ڤه‌رێ ب گشتی و رۆژهه‌لاتا ناڤین ب تایبه‌تی هاته كرن بیر و بۆچوون ل دۆر گاڤێن چاره‌سه‌ركرن و هێمنكرنا ره‌وشێ هاتنه گوهۆرین هه‌ردوو ئالیان ته‌ئكید ل سه‌ر ڤێ چه‌ندێ كر كو ده‌ڤه‌ر نكاریت به‌رگه‌یێ ئالۆزی و گرژیا پتر بگریت و پێدڤی ب سه‌قامگیری و ئاسایشێ هه‌یه.
په‌یوه‌ندیێن دناڤبه‌را حكوومه‌تا هه‌رێما كوردستانێ و حكوومه‌تا عێراقا فیدرال و ئه‌نجامێن دویماهین سه‌ره‌دانا سه‌رۆك بارزانی بۆ به‌غدایێ و هه‌ڤدیتن و كۆمبوونێن وی دگه‌ل ئالیێن سیاسی یێن عێراقێ و بالیۆز و نێردیێن وه‌لاتان ل عێراقێ ته‌وه‌ره‌كێ دی یێ ڤێ هه‌ڤدیتنێ بوون.
هه‌ر د ڤێ هه‌ڤدیتنێ دا ره‌وشا شنگالێ و پێدڤیاتیا ئاساییكرنا ره‌وشا ده‌ڤه‌رێ و جێبه‌جێكرنا رێككه‌فتننامه‌یا شنگالێ هاتنه به‌حسكرن ژ ئالیێ خۆڤه سه‌رۆك بارزانی به‌حسێ وان هه‌ول و قوربانیدانان كر كو د پێناڤ ئازادكرنا شنگالێ و شكاندنا تیرۆریستان دا هاتینه دان به‌لێ ب مخابنی نها چه‌ند هێزێن نه‌یاسایی ل وێرێ نه كو رێگرن ل به‌ر ئاساییكرنا ره‌وشا شنگالێ و ڤه‌گه‌ریانا خه‌لكێ وان ده‌ڤه‌ران بۆ سه‌ر مال و مولكێن خۆ.
د داویا هه‌ڤدیتنێ دا به‌حس ل ئه‌نجامێن دویماهین گه‌نگه‌شێن دناڤبه‌را حكوومه‌تا عێراقا فیدرال و هێزێن هه‌ڤپه‌یمانان دا هاته كرن ل دۆر پرسا هه‌بوونا وان ل عێراقێ و هه‌رێما كوردستانێ.