سەما_صباح سمیر
كچه‌كا رزگاربوويا ئێزدى بناڤێ فه‌وزيه بشار خه‌لكا گوندێ وه‌رديێ ل قه‌زا شنگالێ سەرەرای وان هه‌موو نه‌خۆشى ونەهامەتیێن ديتين، ب وێره‌كی بەحس ل رۆژێن خوە یێن گرتی دناڤ ده‌ستێ تيرۆرستێن داعشێ دا دكه‌ت.
سه‌ما:چ ده‌م تيرۆرستێن داعشێ هێرشى شنگال كر؟
فه‌وزيه بشار:تەمەنێ من ( 19 ) سالن، ل رۆژا 3ی تەباخێ 2014 مە دیت كۆمەكا تیرۆرستێن داعش دەوروبەرێن گوندێ وەردیێ دوورپێچكرن ل وی دەمی ئەز زارۆك بووم و من دڤیا وه‌كو هه‌ر زارۆكه‌كێ خەونێن خۆ یێن پر ژ هیڤین بجهـ بینم و پاشەرۆژەكا گەش ل پێشیا خوە دروست بكه‌م.
سه‌ما: داعش ب چ فێل گوندێ وه‌رديێ دوورپێچكر؟
فه‌وزيه بشار:ل دەمێ دوورپێچكرنا گوندی كەسەكی عەرەب هات و خەلكێ گوندی پشتراست كرن و باوەری بۆ مه چێكر كو چ مەترسی ل سەر ژیانا مه نینە، هەر ئەوی كەسێ عەرەب خیانەت ل خەلكێ گوندی كر، داعش هاتن و هه‌موو خەلكێ گوندی دناڤا مالەكێ دا كۆمڤه‌كرن ژ ترسان من بازدا و من خوە دهەمبێزا دایكا خوە دا ڤەشارت.
سه‌ما: پشتى داعش ده‌ست بسه‌ر گوندى دا گرتى چ ل خه‌لكێ گوندى كر؟
فه‌وزيه بشار:ده‌مێ ئه‌م گرتين سه‌ره‌ده‌رییا وان گه‌له‌ك نه‌یا باش بوو و نه‌یا مرۆڤایه‌تی بوو، چنكو هەر تشتێ ب مە را وەكی دراڤ، زێر، چەك ژ مه هاتە وەرگرتن، پاشان ئەم ڤەگوهاستینه ته‌لله‌عفەر و ل وێدەر ژن و زارۆك و زەلام ژێك جوداكرن، تیرۆرستێن داعش ل دویڤ حەزا خۆهەر كچەك یان ژنەكا ڤیابان ب زۆری بۆ خۆ دبرن، هەروەسا مە داخوازكر بابێن خوە ببینن وان ب شێوازەكی درندانە سەرەدەری دگەل مە دا دكرن و هندەك تیرۆرست هاتن لیستەكا ناڤا دگەل وان دا بوو، ئەم برنە گوندێ كسر المحراب ل ته‌له‌عفه‌رێ ، هەموو خێزانێن گوندێ مه ل سەر مالێن ئه‌وی گوندی بەلاڤكرن، وی دەمی مە گەلەك هەولددان ئەم خوە رزگار بكن لێ ژبەر كو دەوروبەرێ وی گوندی هەموو داعش بوون هەولێن مە د بێ مفا بوون، پشتی چار هەیڤان ژ وی گوندی ئەم برنە باژێرێ مووسل، رۆژ بۆ رۆژێ سەرەدەریەكا ئه‌وان دگەل مە درندانه‌تر بوو و ب تایبەتی ژی زەلام ب زۆری د برنه نڤێژێ.
سه‌ما: داعش چ بسه‌رێ ژنێن دانعه‌مر يێن ئێزدى ئينا؟
فه‌وزيه بشار:پشتی چه‌ند هه‌فتییه‌كا ئه‌م ڤه‌گوهاستینه مووسل و ل وێده‌رێ ژی پشتی هەیڤەكێ دووبارە ئەم زڤراندینه ته‌له‌عفەرێ، ل دەمێ ڤەگەراندنێ چەكدارێن تیرۆرستێن داعش گۆتنە مە ئەم دێ كەسانێن دانعەمر بزڤریننه مال و دەڤەرێن وان وی دەمی بابێ من ئەز و دوو برایێن من دگەل خوە نڤیسین ب مەرەما ڤەگەریانێ ، بابێ من گۆتە داعشێ كچا من فەوزیا ئێشا دلی یا هه‌ی، وی دەمی تیرۆرستەكی داعش ب ناڤێ حه‌جی مەهدی قەبوول نەكر ئەز و برایێن خۆ فەرهاد و ایاز دگەل دایك و بابێن خوە بزڤرینه ده‌ڤه‌رێن خۆ، دەما وی داعشی رەتكری ئەز دگەل مالباتا خوە بزڤرم بابێ من ژی بریار دا دگەل مە بمینت و نە زڤرت و گۆت دەستێ من ژ زارۆكێ من ڤەنابت و وان ناهێلم، ئەڤ چەندە ئەگەر بوو دایك و بابێن من دگەل وان كەسانێن دانعەمران یێن ئازاد كرین نەهاتن، هەروەسا ل سالا 2015 ێ ترۆمبێل ئینان داكو كەسانێن دانعەمر رزگار بكن ئه‌گه‌ر من زانیبا دیتنا وان دێ داوی دیتن بت دێ من ده‌یك و بابیێن خۆ تێر هه‌مێز كربانه.
فه‌وزيه ، ته‌ماشه‌ى وێنه‌يێن خوه دكه ده‌ما دده‌ستێ داعش دا
سه‌ما: ته هه‌ولا ره‌ڤین و خۆ قورتالكرنێ ژ ده‌ستێ داعشێ ددا؟
فه‌وزيه بشار:ب راستی ئەم هەموو كرینە د قوتابخانەكێ دا ل ته‌لەعفەر كو هەر ژوورەكا ئەم تێدا سێ تیرۆرستێن داعش ب چەكێن خوە ڤە دناڤا مە دا دنڤستن ژبەر وان دیمەنێن ب ترس ئه‌م هەموو تووشی ترس و نه‌ئارامییا ده‌روونی بووین، هەر ل وێدەر پشتی برایێ من برن و من گەلەك هەول دان ئەز برەڤم، لی َهەولێن من سەرنەگرتن، ئەڤجا داعشا ئەز فرۆتمه كەسەكی ناڤێ وی یاسر ابو رچوان بوو تەمەنێ وی نێزیكی 24 سالا بوو ژ ئاكنجیێ تاخێ (خضراء ) ل تلەعفەرێ بەرامبەری 500دۆلاران ئەز فرۆتم، هەر وی كەسێ ئەز كڕیم سەرەدەریەكا ئێكجار خراب دگەل من دكرن وی چار زارۆك هەبوون و زارۆكەكی ئێزدی دوێ مالێ دا هەبوو ناڤێ وی مالك بوو دەماغی َوی زارۆكێ ئێزدی هاتبوو شووشتن، ل دەمێ ئەز دگەل یاسر ابو رچوان دژیایم هەر دەما ئەو ژ مال ده‌ركه‌فت با زارۆكه‌كێ ئێزدی داكو ئه‌ز نه‌ره‌ڤم كربوو زێرەڤانێ مالا خۆ، بۆ ماوی َدوو سال و نیڤا ئه‌ز د وێ مالێ دا بووم ، من دوو جاران هەولددا برەڤم لێ هەولێن من سەرنەگرتن و هەر جارەكا رەڤیا بامە دهاتم گرتن و ب توندی دهاتمه ئەشكەنجە دان، ل سالا 2017 شەرێ رزگاركرنا ته‌لەعفەر دەستپێكر وی وەختی چەكدارێن داعش بەرەف سوریا ڤە رەڤیان و ئەم بەرەف باژێرێ دیرالزور ڤە برن، ئەو كەسێ ئەز دگەل خوە برمە سوریا ئەز فرۆتمه كەسەكی دی یێ سوری ب ناڤێ ابو احمد ب تنێ ئێك شەڤێ ئەز ل مالا وی مام و پاشی ئەز ڤەگەراندمه بارەگه‌هێ داعشێ، هەر ل وێدەر ژی من هەول ددا ب ره‌ڤم.
دبه‌رده‌واميا ئاخفتنا خۆ دا گۆت: دەمژمێر چاری بەرێ سبێ بوو ئەز رەڤیام ژبەركو من كەسەك ناس نەدكر گەلەك یه ب ساناهی بوو بێمە گرتن پاشی ابو احمد ئەز برمە مالا هەڤالەكێ خوە ل باژێری میادین یێ سوریا ، دوو هەفتی دەرباس بوون جارەكا دن ب هەمان شێواز هاتمە فرۆتن ب داعشه‌كی بناڤێ بەشیر و بۆ ماوێ هەفت رۆژان ل وێدەرێ ژی بووم، ڤێجارێ من هەولەكا باش دا داكو برەڤم ،چونكی ئەو مالباتا ئەز لێ من ژ وان گوهـ لێ بوو كو دگۆتن لایێ دی یێ رۆبارێ فورات یێ باژێرێ میادین نە دەستێ داعشێ دایه، ئەڤجا ئەز رەڤیم و من خوە گەهاندە بەر رۆباری و ئەز گەهشتمە لایێ بەلەمێن دچنه لایی َدی یێ رۆباری، ئەڤه دەرفەتا من یا رزگاربوونێ بوو و ئەز كەتمه دناڤا بەلەمێ دا لێ بەختێ من هۆسا بوو كو خودانێ بەلەمێ چەندین جاران هەولدا ماتۆری ڤێخینت لێ كار نەكر، ئەو چەكدارێ داعش ب من را گەهشتن و دووبارە ئەز گرتم و برمە مال.
فه‌وزيه و كورێ برايێ وێ دهه‌مبێزا وێ دا
هه‌روه‌سا ئەو كەسێ ئەز ل مالا وی دوو مەرج دانە بەر من ئێك یان دێ تە بزەوجینن یان بفرۆشن من فرۆشتن هەلبژارت، وەكی هەرجار ئەز هاتم فرۆشتن دیسان كەسەكی دی ب ناڤێ ابو احمد بوو، ئەو ژی سوری بوو و ل مالا وی دوو كچێن ئێزدی ژی هەبوون لێ من نكاری وان ببینم ژبەر كو ئەز ل مالا خوە دا كربوومە د ژوورەكی َدا و دەرگەهـ ل من گرتبوو، وی دەمی ئەو باژێر دهاتە تۆپ باران كرن ژلایێ فرۆكەیان ڤە و ل نێزیك مالا ئەز تێدا د هاتە بۆمبەباران كرن و ئەم رەڤین ژ وی جهی، جارا داویێ ئه‌ز هاتمه فرۆتن ب كه‌سه‌كی ب ناڤێ زەكەریا ڤێ جارێ ئەڤ كەسێ ئەز پێ هاتیمه فرۆتن دەركەفت (مهرب) و ئەڤی كەسی ئەز برمە مالا خوشكا خوە و نێزكی 15 رۆژان ل وێدەر بووم و رۆژەكێ ابو زەكەریا گۆتە من دێ تە ڤەگەرینمه ناڤ مالباتا تە ژبەركو من گەلەك نەخۆشی و دەردەسەری دیتبوون و ژبەر وێ زولما ل من هاتی كرن د وی ماوێ درێژ یێ ده‌سته‌سه‌ركرنێ دا باوه‌رییا من ب كه‌سی نه‌دهات.
سه‌ما: چاوا ژ ده‌ستێن تیرۆرستێن داعشێ رزگاربووی؟
فه‌وزيه بشار:ده‌مه‌كی نێزیكی دەمژمێر (4) هێڤاری بوو ل هەیڤا ئۆكتۆبەرێ ل سالا 2017 ئێكی گۆتە من “ئەز دێ تە ڤەگەرینمە ناڤ كەسوكارێن تە “، و ناڤ و نیشانەك دا من و بەری هنگی گۆتە من “دێ تە به‌مه جهەكی و كەسەك وێ تە وەرگرت و هێزێن كوردی ل رۆژئاڤایێ كوردستانێ دنێزیكی وی جهی بوون گۆتژی دەما تە دگەهینم وی جهی بێژە وان ئەز ئێزدیمە و دەما ئەز گەهشتیمه وی جهی من تشتەك و چ هێزەك نە دیت ، ئەز مام من كەسەك ناس نە دكر تنێ من مزگەفتەك ل وێدەر دیت و ئەز چۆمه د وێ مزگەفتێ دا من كەسەك دیت وی كەسی گۆتە من توو وا هندابووی پشتی من چیرۆكا خوە بۆ وی گۆتی ئەوی كەسی گۆت ڤێ سبێ هێزێن كوردی ل ڤی جهی پاشڤە چۆنە و ڤەكشیانە و گۆت ژی دێ تە به‌مه مالا خوە ل باژێرێ دیرالزور و دێ تە وەك خوشكا خوە قەبوول كه‌م ژبەر چیرۆكا من و یا ب سەرێ من هاتی ئەو كەسی دلۆڤانی ب من بر.
فه‌وزيه، ته‌ماشه‌ى وێنه‌يێ خوه دكه‌ت ده‌ما دده‌ستێ داعش دا ل سوريا
ناڤێ وی كەسی عمار بوو،خێزاندار بوو و پشتی (3) هەیڤان ئەز ل مالا وی مام و ئەم رەڤیان بۆ ناڤ كەمپا هۆلێ وی دەمی عمار بەرێ من دا چیایێ شنگالێ گۆتە من توو دزانی ئەڤە چ چیایە من گۆتێ ئەز نزانم ئەوی گۆت ئەڤە چیایێ شنگالێ یە ب راستی ژی ژبەر دەردێ من یێ گران و دووربوونا من ژ كەسوكاران و وێ زولم و زۆرداریا ل من هاتیە كرن، رۆژەكێ گۆتە من ئەز سۆزێ د دەمه ته كو تە بگەهینمه خێزانا تە، ئەڤجا من پێزانین دانێ ل سەر خێزانا خۆ ئەوی ب رێكا هەڤالەكی خوە ئەو پێزانینێن من گەهاندنە كەسەكی كو ئەڤ كارە دكر و دەنگوباس گەهشتنە مالباتا من كو ئەز یا ل كەمپا هۆلێ، پشتی برایێ من زانی ئێكسەر هاتە سوریا ل كەمپا هۆلێ ژبەركو من باوەری ب هیچ كەسەكی نەمابوو من گۆتە ئەوی كەسێ ئەز ل مالا وان دەما برایێ من دهێت من نەڤێت وی ئێكسەر ببینم من دپەنجەرا خیڤەتێرا لێ دنێری پشتی ئەز پشت راستبوویم كو ئەو برایێ منە ئێكسەر من بازدا و من خۆ هاڤێتە هەمبێزا برایێ خۆ وی دەمی پشتی چار سالان ژ زولم و زۆرداریێ و بندەستیێ من ژنوو هەست كر كو ئەز یا ئازادم، برایێ من سعدۆ ئەز ژ كەمپا هۆلێ ئینامە دەر و ئەم بەرەف مالا محمود رەشو چۆن كو كەسەكی ئیزدی بوو و ئەڤ رزگاركرنە بۆ من بوونە دوو رزگار كرن ئێك ئەز رزگار بووم و یا دی ژی ئێڤارا جەژنا سەرێ سالێ ل 2018 وی دەمی من دگەل كچَێن محمود رەشۆ مە هێك رەنگا و رەنگ كرن .